Rai ka Sorkar Mizoram ban pynduh lut ïa ka jingthied kali thymmai ïa ki Myntri Sorkar ne MLA

Shillong, Nohprah 10 : Ka sorkar ba thymmai ha Mizoram hapoh ka jingïalam jong u Lalduhoma kum u Myntri Rangbah ka la rai ban pynduh noh ïa ka jingthied kali thymmai ïa ki MLA na ka pisa paidbah kumba ju leh baroh shi katta.
Ym tang katta, katei ka sorkar Zoram People’s Movement (ZPM) kaba la jynrat syndon ïa ka sorkar MNF na ka bor, ka la rai ruh ba kane kan treikam wat ïa ki Myntri Sorkar ha kaba kin hap ban pyndonkam da ki kali kaba ju pyndonkam da ki Myntri kiba rim. Ïa kane u la pynbna haba kren sha ki paidbah hadien ba u la dep ban shim smai kum u Myntri Rangbah ba thymmai katei ka jylla.
Kawei pat ka rai ba ka shim ka long ban peit ïa ka rukom treikam ha ki tnad bapher bapher bad ban pan jingkheiñ ïa ka jinglah bad ka jingbym lah treikam kaba ki hap ban ai jubab shwa ban kut u Kyllalyngkot, 2024.
U Myntri Rangbah u la pynbna ruh ba ka sorkar jong u kan pynduh noh ïa ki 14 tylli ki board ba la pynmih da ka sorkar ba rim.
U la ong ruh ba ka sorkar jong u kan peit ruh ïa ka jingtreikam kaba janai jong ki nongtrei ha ki ophis sorkar da kaba buh da ki biometric attendance system kaban pyntikna ïa ka jingpoi biang por bad wan tista.
Lah ruh ban kdew hangne ba u Lalduhoma u la shim smai kum u Myntri Rangbah ba 9 jong ka Mizoram ha ka sngi Thohdieng ryngkat bad ki 11ngut ki Myntri Sorkar.
Ka sorkar ZPM ka la thaw history ruh da kaba thung ïa ka Lalrinpuii na Lunglei East Constituency kum ka myntri sorkar ba nyngkong tam. Kane ka Myntri kan peit ïa ka tnad health, social welfare, women and Child Development bad kiwei kiwei.
La buh thong ruh ba ka sorkar jong u kan buh hakhmat eh ïa ka bha ka miat jong ki nongrep bad khamtam eh ban ïakhun ïa ka bamsap. La pynbna ruh ba ka sorkar ka buh thong ban pyntreikam noh ïa ki 12 tylli ki rukom treikam kiba hakhmat eh hapoh ki 100 sngi.