Da ki phew hajar tuid ki riewngeit sha ka Proseshon Iukharist banyngkong eh ha Kynshi

Kynshi, Nohprah 10: Ka Shnong Kynshi ha ka Sngi U Blei ka la shitrhem da ki jingrwai ïaroh bad ki sur khot kylla kaba mut lyngba ka Proseshon Iukharist jong ka Nongstoiñ Diocese.
Kane ka dei ka sien kaba nyngkong eh ba ka Parish Kynshi kan pdiang ïa ka Proseshon jong ka Jylla Niam Nongstoiñ.
Da ki phew hajar ki paid Khristan Katholik ki la poi sha kane ka jingmane Blei ha kaba kiwei pat ki Balang Khristan na Kynshi ki la ïashim bynta lang.
Ha ka por mynstep u Bishop jong ka Jylla Niam Nongstoiñ, u Most Rev. Wilbert Marweiñ u la pynbynta ïa ka jingkñia Mass Bakhuid bad sam ruh ïa ka Khubor na ka Ktien U Blei da kaba pynkynmaw ïa ka jingkhot jong u Ioannis sha ka jingkylla kaba mut jong ki nongpop.
Ha ka jingduwai ki riewngeit la duwai kyrpang ia u Pope Francis bad ïa ka jingshongsuk ha ka pyrthei baroh kawei namar ka jingkhie ka thma Ukraine bad Russia, ka thma Israel bad ki Hamas bad kumjuh ruh ka jingbym don ka shongsuk shongsaiñ ha Manipur.
Ha ka por mynstep la sakhi lang ruh ki Sordar ka Shnong Kynshi Pyllun bad kumjuh ruh ki Tymmen Basan jong ki Balang kiba don ha thaiñ Kynshi.
Ha ka por nohphai sngi la pynlong ïa ka Proseshon Iukharist da kaba ïaid ïa ka surokbah National Highway 44 E bad kumjuh ruh ïa ki surok ka shnong Kynshi. Ka jingïaid Proseshon ka la shim por ar kynta ban pyndep bad la ïohi ba ki paidbah nongshong shnong ki la ïa mih na la ki ïing ki sem bad peit ïa ka jingïaid Proseshon banyngkong eh ha ka shnong jong ki kaba heh bad bun briew kat kane kaba kim pat ju iohi koit mynno mynno ruh.