Shillong, Naiwieng, 14: Ka Sorkar Jylla ka la rai ban wanrah da ka Office Memorandum (OM) ban pynjanai ïa ka jingtreikam jong ka tnat Public Works Department (PWD).
Ïa kane ka rai la shim ha ka jingïalang ba la pynïaid da u Symbud Myntri Rangbah uba peit ïa ka tnat PWD (Roads) u Bah Prestone Tynsong bad ki ophisar jong ka tnat Planning, Finance bad PWD kaba la long ha ka sngi Baar.
Ha ka jingïakren bad ki lad pathai khubor, u Bah Tynsong u la ong, “ïa ka Presentation la wanrah da ki lai tylli ki tnat treikam halor kawei ka mat kaba thmu kumno ban pynjanai ïa ka jingtreikam jong ka tnat PWD la ka long ha ka surok, ka jingshna ïa ka surok thymmai, la ka long ha ka jingmaramot ïa ka surok kaba rim.”
Katkum ka jingong jong u, kane ka long namarba ïa mynta ka Jylla Meghalaya ka don ym duna haduh 10,000 kilomitar ki surok kiba hap hapoh ka jingpeit jong ka Jylla hynrei lait noh ïa ki surokbah National Highways bad ïa ki surok kiba la aiti ban pyntrei da ka NHIDCL.
“Ngi la ïathir sani bha ïa kine ki jnit ki jnat bad shen ngin sa wanrah da ka Office Memorandum,” u la ong bad bad bynrap, “ha ka Presentation, ngi la ïathir ïatai (halor ka jingdonkam) ban pynhap kyrdan wat ïa ki surok kiba hap hapoh ka jingpeit jong ka Jylla kumba ngi la leh ïa kawei ka surokbah bakongsan, ban peit kano ka surok kaba rit bad kano ka surok kaba dei ka surok shnong, kano ka surok kaba ïaid ki kali kit mar kaba pynsuk ïa ka kit ka bah bad ka rah ka rong.”
“Kine ki dei ki mat ba ngi la ïakren bad ngi la shim rai bad ngin sa lah ban wanrah ïa kine ki mat jingïakren ha ka dur jong ka Office Memorandum,” u la bynrap shuh shuh.
