Rai ka ïing bishar ban set phatok 14 snem ïa ki 2 ngut ki nongleh beijot ia ka khynnah

Shillong, Naiwieng 01 : Ka ïingka bishar Special Court (POCSO) ka East Khasi Hills, ka la hukum ban set phatok haduh 14 snem lem bad ka kuna kaba mar 50,000 tyngka ïa ki arngut ki runar kiba leh beijot ïa ka khynnah ba dang 12 snem ha ka shnong kaba hap hapoh ka Mawngap Police Station.
Kat kum ka jingïathuh u Superintendent of Police ka East Khasi Hills, kane ka khynnah ka dei kaba dang pule klas VII bad ki Pulit kila ïoh pdiang ïa ka ejahar ha ka 03/12/2018.
La ïathuh ba kat kum ka ejahar, kane ka khynnah ka la shah leh beijot la bunsien ha u briew uba kyrteng u Mortorjune Kharbani ba 45-50 snem ka rta ha u snem 2017 ha la ka jong ka ïingsah katba ka dang don marwei hala ïing.
Ki Pulit kila register case ïa kane ka ejahar ha Mawngap Police Station kat kum ka C/No. 56(12)2018 U/S 506 IPC r/w sec 5(l)(m)(n)/6 POCSO Act bad la tohkit ïa ka da ka WPSI Larisha Kharjana.
La ïathuh ba ha ka jingtohkit, la shem ba kane ka khynnah ka la shah leh beijot ruh sa ha uwei u briew ba kyrteng u Lumding Syiemlieh. Hadien ba pyndep ïa ka jingtohkit, kane ka heh pulit ka la charge sheet ïa kine ki briew ha ka 28 tarik Kyllalyngkot, 2019.
Ka iing bishar Special Judge (POCSO) haba bishar ïa kane ka mukotduma ka la shem ba kine ki arngut ki briew ki la donkti ha kane ka kam bymman bad ha ka 27 tarik Risaw, kala pynmih ia ka hukum ban set phatok ïa kine ki briew haduh 14 snem lem bad ka kuna ba mar 50,000 tyngka.