Shillong, Naiwieng 01: Ka Myntri ka tnat ka koit ka khiah ka Kong Ampareen Lyngdoh mynta ka sngi ka la kyntu ïa ki nongtrei ASHA ba kim dei ban sangeh treikam namar ka sorkar jylla ka la shim khia ban pynurlong ïa ki 2 tylli ki mat jingdawa jong ki.
Lah ban kdew ba ka tnat ka koit ka khiah ka la mynjur ban bei tyngka lada ki ASHA ki shitom bad thaw da ki Polisi ban nym don shuh ka jingshah weng kam tang da ka rai ki VEC lane ki Dorbar hynrei haba ïadei bad ka jingdawa kyntiew bai nong, ka Myntri ka tnat ka koit ka khiah ka la kular ban ïakren bad u Myntri Rangbah ka jylla ha ka 6 tarik mynta u bnai.
Haba pynpaw ïa ka jingsngewdiaw halor ka rai jong ka MAWU ban phah shong jahthait ïa ki ASHA haduh 6 tarik mynta u bnai, ka Myntri ka tnat ka koit ka khiah ka la ong “Nga kyntu ïa ki nongtrei ASHA ban don ka jingshaniah haba ïatreilang bad ka sorkar, ym ban ïatynjuh bor da kaba sangeh treikam…. ka shong ha ki ASHA mynta ban pynshai namar ki dei ki nongïarap ïa u paidbah, u paidbah khlem ki ASHA kan don ka jingdkoh haka koit ka khiah, hato phim shaniah ïa ka sorkar haduh ba phin ïa shong jahthait haduh ka 6 tarik”.
Ka Kong Ampareen ka la ong ba kum ka Myntri ka tnat ka koit ka khiah kam lah ban kular la yn lah ne em ban shim rai ban pynkiew ïa ka bainong jong ki ASHA ha ka jingïalang bad u Myntri Rangbah ka ban long haka 6 tarik mynta u bnai.
Kala iathuh ba ka sorkar ka donkam sa T.40 klur man u snem ban pynbit pynbiang ia kumba 7000 ngut ki ASHA hapoh Meghalaya.
“Nai leh ïa kine ki kam ki ban pyndkhoh ïa ka koit ka khiah jong u paidbah, shaniah ïa ka sorkar, ka dei ka sorkar kaba phi jied hi ma phi bad ka dei ruh ka sorkar ka ban khmih ïaki jingdonkam jong phi. Ym donkam ïa ngi ban ïatyngkhuh para ba ïatreilang” kala ong.
