Yn sa rah ha Parliament ia ka Amendment halor ka Khyrnit ba Hynriew : Prestone Tynsong

10 snem mynshwa don kiba dawa da ka 371 bad ban pynduh District Council

0

Shillong, Naiwieng 01 : U Symbud Myntri Rangbah ka jylla, Bah Prestone Tynsong ha ka sngi Balang u la ong ba ka jingpynkylla thymmai ïa ka Khyrnit ba Hynriew kan sa treikam noh shen na ka bynta ban pynkhlaiñ shuh shuh ïa ka jingtreikam jong ki District Council.
“Ka Amendment kan sa treikam noh shen. Ka Parliament kan sa rah ïa kane ka Amendment bad lada rah ïa kane kan nang pynskhem bad pynjanai shuh shuh ïa ka bor jong ki district council,” ong u Bah Prestone haba kren kum u Kongsan ha ka jingrakhe ïa ka lyngkhuh sngi ïap ba 64 jong u Kpa ki District Council, Bah JJM Nichols Roy kaba long hynne ka sngi ha Auditorium jo ng ka JJM Nichols Roy Memorial Auditorium, Qualapatty Shillong.
Katkum ka jingong jong u ka la mih bun ka jingïakren namare ha District Council shiphang kiew shiphang hap ka Executive Committee bad ba ki MDC ki phet shiphang nawei shawei.
“Imat dei na kata ka daw kaba pynlong ïa ki briew ban ong ba ym don ba shaniah shuh ïa ki District Council,” u la bynrap biang da kaba ong ruh ba lada treikam kane, ka Parliament lane ka Ïing Dorbar Thawain ka Jylla kin ym lah shuh ban mushlia ïa ka bor jong ka District Council.
Shuh shuh u ong ba un sa thoh ruh sha baroh ki District Council ba don ha ka jylla ba kin rakhe lang ïa katei ka sngi khraw namar u Rev. JJM Nichols Roy um dei tang na bynta ki Khasi hynrei na bynta baroh ki riewlum ha Ri India namar dei ma u ba pynïoh ïa ka Khyrnit ba Hynriew ha baroh kawei ka ri India.
Shwa kane, u Bah Prestone u la ïathuh ruh ba 10 snem mynshwa don u MLA ba wanrah ïa ka Motion ha Ïing Dorbar ban wanrah noh da ka 371. U ïathuh ruh ba ha kato ka por ba u bat kum u Myntri Sorkar ki la ïakren ïa kane ka sobjek bad kumta ki la kyntait noh ïa ka.
Nalorkata u ïathuh ruh ba ha ka por ba jur bha ka jingïakhih pyrshah ïa ka Citizenship Amendment Bill (mynta CAA) u Bah Prestone u la pynkynmaw ba ki la hap ban ïatylli baroh ki sengsaiñ pyrthei bad leit kynduh ïa u Myntri Rangbahduh bad ruh ïa u Myntri Kampohïing ka ri ban pyllait noh ïa ka Meghalaya na katei ka aiñ.
“Ha kaba khatduh ka Sorkar India ka la ong ba jait ba ka Meghalaya ka hap ha ka Khyrnit kaba Hynriew la lah ban pyllait noh na ka CAB (mynta CAA). Kumta haba ngi wad jingtip ha baroh kawei ka jylla katno persen ki hap ha ka Khynrit ba Hynriew bad ngi lap ba kiba lait dei tang lai persen kaba mut jan baroh ki hap ha ka Khyrnit ba Hynriew.,” u la ong da kaba pynpaw ia ka jingkmen ba ka jingdon ka Khyrnit kaba Hynriew ka la weng phar ia ka jingsyier jong ka Jylla na ki tyrsim jong ka CAA.
Haba bynrap lang, u CEM ka KHADC Bah Pynïaid Sing Syiem u la ong ba kiwei ki jylla bym don ïa ki District Council ki angnud ban ïoh ïa ka. Kumta u ong ba ka long kaba donkam ïa kiba la don lypa ban sumar bha ïa ka.
“Ngi don ka stieh hynrei don pat kiba kwah ban pynpei noh ïa ka stieh hynrei ngin ïakhun triang ban pynneh ïa ka. Nga kyntu ruh ïa ki Dorbar Shnong ban ai ka jingïatreilang na ka bynta ban lah ban saindur ïa ka imlang sahlang,” ong u CEM.
Ha kajuh ka por u la ong ruh ba kum ki paidbah ki la dei ruh ban ainam ïa utei u riewkhraw ba ka Jaidbynriew ka sei ym ha kito kiba kyrhuh kylleng khlem pat noh synniang ei ei.
Ha kane ka sngi la sam ruh ïa ki khusnam sha ki nongjop ha ki jingïakob ïa tyrko, nangta ha ka jingïakob mareh cross country.
La donlang ruh ha kane ka sngi la donlang ruh naduh u Nongïalam ka Liang Pyrshah ka Ïing Dorbar Thawaiñ ka Jylla, Bah Ronnie V Lyngdoh, u Chairman ka KHADC u Bah Lamphrang Blah, Deputy CEM Bah PN Syiem, Bah Fantin J Lakadong Executive Member, bad ruh ki MDC nalor u Principal jongka Rev JJM Nichols Roy College u Rev Dr R.G.M. Sohkhia, ki nongïalam Balang jongka Church of God, Chairman ka JJM Nichols Roy Memorial Committee Bah Ransom Sutnga, ki nonghikai, ki samla pule bad kiwei kiwei.
Ha ka por mynstep, ka KHADC ruh ka la pynlong ïa ka prokram kaba shongkun bha ha phyllaw jong ka KHADC ban kynmaw burom ïa ka lyngkhuh sngi ïap jong utei u Kpa ki District Council.

Leave A Reply

Your email address will not be published.