Shillong, Naiwieng 16 : Ka Mizoram ka la pynïam kthang ïa ki paid nongkyrshan ka Meghalaya hadien ba ka lah ban khur ïa ka jingjop da 2-1 ha ka jingïakhun final jong ka U-21 ki shynrang ha ka 2nd North East Olympic Games 2022 kaba la long hynne ka sngi ha madan MFA, Polo.
Hadien ka jingbym lah ban thep kol ha ka kylla step, u Rohlupuia u la ïoh ban pynkhih jar nyngkong eh na ka bynta ka Mizoram ha ka minit kaba 54 bad ïa ka kol kaba ar la thep da u Malsawmtluanga ha ka minit kaba the 80. Hashwa ban kut ka jingïalehkai u Oresterwell Langshiang ula lah ban pynphai kylla na ka bynta ka Meghalaya ha ka minit kaba 87 bad hadien kam shym la lah shu ban pynphai ha kaba ka la mad ïa ka jingshah rem.
Ha kane ka jingïalehkai final la wan ban sakhi da ki hajar ngut ki paidbah na ka bynta ban ai mynsiem ïa ki jong ki rangïalehkai ha kaba ki la pyndap hi smam ïa ki jaka shong ha madan Third Ground bad ruh ha SSA Stadium wat hapdeng ka jingshit jong ka sngi. Da ka jingkhmih lynti ïa ka jingtiud ki paidbah, ka Meghalaya Football Association ka la buh da ki giant screen ha madan First Ground bad ba ki lah ban sakhi ïa katei ka jingïalehkai.
Ha kane ka jingïakhun ka Meghalaya ka la sdang ban kulmar jingmut ha kaba sdang, hynrei ki rangïalehkai ‘dien ki la lah ban ïashan ban pyllait na ka jingshah thep.
Hapoh ki 10 minit ka Mizoram ka la pyrshang ban ïalehkai bha, hynrei ki rangïalehkai ka Jylla ki la lah ban ïashan tyngeh ban pyllait na ka jingshah thep.
Hynrei tang mar ïasdang ka jingïalehkai jong ka kylla miet, u Rohlupuia u la ïoh ban shut ïa ka bol ha kaba ka la leit dei na u rangapkol u Rajat Paul Lyngdoh, hashwa ba kan rung sha kol.
Hadien katto katne por ka Meghalaya ka la ïoh ïa ki katto katne ki kabu ksiar, hynrei u Everbrightson Mylliempdah u la pynlehnohei bad u Figo Syndai um shym la lah ban thep na ka daw ka jingïashan tyngeh u rangapkol ka Mizoram.
Hadien katto katne por, ka Mizoram ka la ïoh ïa ka kabu kaba biang lyngba u Mawawmtluanga na ka bynta ban thep ïa ka kol kaba ar.
Sa tang 10 minit shwa ban kut ka jingïalehkai, ka Meghalaya ka la ioh ia ka kabu kaba biang ban pynphai lyngba u Oresterwell Langshiang.
Wat hapdeng ka jingai mynsiem jong ki paidbah, ka Meghalaya kam shym la lah shu ban pynphai bad ha kaba kut ka Mizoram ka la khur ïa ka jingjop. Ha kawei pat ka jingïakhun final jong ki kynthei U-17, ka Manipur ka la pynliem noh ïa ka Arunachal Pradesh da 4-0 kol.
Ha kane ka jingïakhun kaba khatduh ka S. Lynda Kom kaba la khur ïa ka nam Player of the Match ka la thep ar kol (29′, 44′) ha ka kylla step hashwa ba ka Manipur kan pynbud biang sa ar kol ha ka kylla miet lyngba ka L. Babina Devi (62′) bad ka L. Shelia Devi (87′) na ka bynta ban khur syndon ïa ka jingjop.
Kane ka takma ksiar ka la long ka jingïarap ïa kane ka kyhhun ban don ha ka jingïaknieh na ka bynta ban khur ïa ka nam lahduh ha ka NEOG 2022, namar hynnin ka miet ka Manipur ka la tam ïa ka Assam haka jingïoh khur takma da 78 la 75 bad mynta ka la kynjoh sha ki 79 tylli ki takma ksiar.
Ïa ki khusnam kyrpang ha ka U-17 women, ka Keisham Melody Chanu na Manipur (Golden Glove), Loktongbam Shelia Devi na Manipur (Golden Boot), Angel Tamang na Arunachal Pradesh (Player of the Tournament). Ïa ki khusnam ha ka U-21 men, u H Lalrinzuala na Mizoram (Golden Glove), Joseph Lalvenhima na Mizoram (Golden Boot) bad u Figo Syndai of Meghalaya (Player of the Tournament). Ïa ki khusnam la sam da u Myntri Rangbah ka Jylla u Conrad K Sangma, ryngkat u Myntri ka tnat ïalehkai u Bah Banteidor Lyngdoh, u Chief Secretary Bah Donald P Wahlang bad kiwei ki heh ophisar kiba la ïadon lang ha kane ka sngi.
