Shillong, Naiwieng 16 : Ka Arunachal ka la ïoh ban khur shiteng ki takma ksiar ha ka jingïalehkai karate jong ka 2nd North East Olympic Games 2022, ha kaba ka la khur 12 na ki 24 tylli.
Ka Arunachal ka la ïoh ban khur 7 tylli ki takma rupa bad 5 ki takma rnong. Ka Meghalaya ka la wan ba-ar ha kaba ka la khur 8 ki takma ksiar, 5 ki takma rupa, bad 7 ki takma rnong. Ka Manipur ka la khur 2 ki takma ksiar, 3 ki takma rupa bad 7 ki takma rnong, ka Assam ka la khur kawe ka takma ksiar, 4 ki takma rupa bad 7 ki takma rnong, ka Sikkim ka la khur kawei ka takma ksiar, 3 ki takma rupa bad 8 ki takma, ka Mizoram ka la ïoh ban khur 2 ki takma rupa bad 10 ki takma rnong, katba ka Tripura bad ka Nagaland ki la khur 2 ki takma rnong.
Hynne ka sngi, ka Meghalaya ka la ioh ban khur kawei ka takma ksiar ha ka Senior Men -67kg kumite hadien ba u Garry Daniel L. Mawlong u la lah ban pynliem noh ïa u Doni Neri na Arunachal Pradesh. U Hari Pradhan na Assam bad u TC Lalrinsanga na Mizoram ki la khur ïa ka takma rnong.
Ha ka Senior Men +67kg, ïa ka takma ksiar la khur da u Anand Chetri na Arunachal Pradesh, ïa ka rupa la khur da u Prasujya Gogoi na Assam bad ia ka takma rnong la khur da u Ïalamphang Kharkongor na Meghalaya bad u Ratnadeep Bhattacharjee na Tripura.
Ka Meghalaya ka la khur ïa ka takma ksiar ha ka women’s -61kg kumite ha kaba ka Barisha Kharbani na Meghalaya ka la jop ïa ka Smita Rai na Sikkim. Ïa ka takma rnong la khhur da ka Mimi Ramchang na Arunachal Pradesh bad ka Bina Shaki Pukhrihungbam na Manipur.
Ha ka women’s -68kg, ïa ka kyrdan ba nyngkong la khur da ka Neemu Lepcha na Sikkim, ïa ka takma rupa la khur da ka Lalrinzuali na Mizoram, katba ïa ka takma rnong la khur da ka Jonmoni Das na Assam bad ka Yaki Dignium na Arunachal Pradesh.
Ha ka women’s +68kg, ka Arunachal Pradesh bad ka Assam ki la ïa kynduh ïa ka final ha kaba ka Johny Mangkhiya ka la khur ïa ka takma ksziar, bad ka Emon Gogoi ka la khur ïa ka takma rupa. Ïa ka takma rnong la khur da ka Tibenla Jamir na Nagaland bad ka Laltanchhuahi na Mizoram.
