Rah nam lahduh ka 7 Wasa United FC ha ka Super Division ka WJDSA

Jowai, Nohprah 16: Ka kynhun ïalehkai jong ka 7 Wasa United FC kala long syndon ka lahduh haka jingïakhun phainal mynta ka sngi ha ka kyrdan Super Division Football Tournament 2023 ïa kaba la ai kyrteng ‘U Kiang Nangbah Memorial Trophy 2023’ ba la pynïaid daka West Jaiñtia District Sports Association, (WJDSA) ha madan Kiang Nangbah Stadium, Dongmihsngi Jowai.
Haba phai sha ka jingïakhun Final kala long kaba itynnad bad kaba ïakhaid bor bha hapdeng kine ki ar kynhun namar haka jingïakhun jong ka kylla step na baroh ar liang kim shem la ïoh ban thep kol satia kaba la neh 0-0.
Haba wan jong ka kylla miet na ka liang ka 7 Wasa United kala ïoh ban thep haduh ar kol kata lyngba u Civility Khongmalai haka minit ba 58 bad u Pynshai Lathong haka minit ba 60.
Ka Ladthadlaboh kala pyrshang ban pynphai kylla ïa kitei ki ar kol hynrei dei ha ka por hashwa ba kut jong ka jingïakhun kala ïoh ban thep ïa kawei ka kol lyngba u Sanki Langstang haka minit ba 86.
Haduh ba kut jong ka por ka 7 Wasa United kala long syndon ka lahduh ki jong kane ka lympung mynta u snem da kaba jop da 2-1 kol ïa ka Ladthadlaboh
Ïa ki khusnam sha ki nongjop la sam da u kongsan jong kane ka sngi uba dei u MLA ka Jowai ma Wailadmiki Shylla ha ryngkat ka jingdanlang u (Nominated) MDC ma O. Lamin, u DSO ma K. Passah, ki nongkitkam jong ka WJDSA nalor kiwei de.
Na ka liang ka kynhun 7 Wasa United FC kaba ïoh rah ïa ka nam lahduh kala ïoh rong ia ka song pisa kaba 50,000/- hajar tyngka ryngkat ka Trophy, katba ka kynhun ba wan ba ar ka Ladthadlaboh kala ïoh rong 30,000/- hajar tyngka lem bad ka trophy.
La sam ruh ïaka nam Man of the Match bala ïoh da u Dashngaiñ Sukhlaiñ naka 7 Wasa United, ka nam Best Goal Keeper la ïoh da u Pynshngaiñlang Tyngkra naka 7 Wasa United, ïa ka nam Top Scorer la ïoh da u Banteilang Shylla na ka Ladthadlaboh uba la ïoh thep haduh 7 kol, katba ïa ka nam Player of the Tournament la ïoh da u Risanlang i Dkhar naka 7 Wasa United FC.