Srinagar, Nohprah 16: Ka kynhun ïalehkai jong ka Shillong Lajong ka la shah pynliem da 3-1 kol ha ka Real Kashmir ha ka jingïakhun kaba la long hynne ka Sngi jong ka lympung I-League kaba la long ha Srinagar.
Haba bishar ïa ka jingïakhun, lah ban kdew ba ka Real Kashmir, ka kynhun ba ïalehkai hala ïing, ka la shimpor tang 5 minit ha ka kylla step ban ïoh thep ïa ka shi kol kaba la wan lyngba u player midfield na Ghana- u Kamal Issah.
Na ka liang jong ka Lajong ka la pyrshang katba lah ban pynphai ïa katei ka shi kol bad dei ynda la jam sha ka 16 minit ba ka kynhun ka la ïoh ban pynïakhaid lyngba u Karim Samb kaba dei ruh ka kol kaba ar ïa u na ka kynhun mynta ka samoi.
Baroh arliang ki la hun da tang mar 1-1 kol ha kaba kut jong ka kylla step.
Haba jam sha ka jigngïakhun jong ka kylla kaba ar, ka Real Kashmir ka la ïoh ban buh biang shakhmat ïalade lyngba ka kol ba la thep da u Gnohere Krizo ha ka minit ba 55. Hadien katto katne por u Mohammad Inam u la ïoh ban thep sa ïa ka kol kaba lai ha ka 69 minit ban pynthikna ïa ki lai point na bynta ka kynhun.
Haduh kaba kut jong ka jingïakhun ka Lajong kam shym la ïoh shuh ban pynkhihjar kaba la pynlong ïa ka ban shah rem.
Da kane ka namrem, ka Lajong ka la hiar sha ka kyrdan ba san da 16 point na ki 10 sien ïakhun ba ladep, katba ka Real Kashmir ka shong ha ka kyrdan ba lai da 20 point naki 10 sien ïakhun.
Hadien ki ar sien lynter ki namrem ka Lajong kan wanphai biang shala ïing ban pynkhreh ïa ka jingïakhun ka ban long ha ka 23 tarik Nohprah hala ïing, ha kaba ka Shillong Lajong kan sa hap ban aireng pyrshah ïa ka Namdhari FC ha madan SSA Stadium.
