Shillong, Nohprah 29 : Ka United Democratic Party, Youth Wing jong ka Sohïong Circle ha ka 28 tarik Nohprah kala pynhap pyrda noh ïa ka 1st Sohïong Constituency Knockout Football Tournament 2022 ïa kaba la pynlong ha madan Marpna, Sohïong.
Ha kane ka Knockout Football Tournament na ka liang ka UDP Youth Wings jong ka Sohïong Circle kala phiah ha ki ar bynta kawei ka dei ïa kiba la kynjoh sha ka 35 snem shajrong katba kawei pat kadei na ka bynta ki samla kiba don ha ka rta ba 35 snem shapoh, bad ki team kiba la poi sha ka final jong kiba la 35 snem sha jrong kadei ka Krang Area pyrshah ïa ka Weilyngkut katba ha ka final jong ki samla kiba hapoh ka 35 snem ka rta ki kynthup ïa ka Diengïei Area pyrshah ïa ka Sohïong Area.
Haba phai ha ka jingïalehkai kaba la long hapdeng ka Krang Area pyrshah ïa ka Weilyngkut ka jingïalehkai ha ka kylla step kala long shisha ka jingïalehkai kaba itynnad namar baroh ar tylli ki team kila ïakhun dohïap ban ïoh pynkhih nyngkong ïa ka jar hynrei namar ka jingbiangbor jong baroh ar kynhun ym shem la don satia kiba lah ban pynkhih jar tad haduh ba kut ka por jong ka kylla step.
Haba sdang ka kylla miet ka jingïakhun ruh ka long hi kumjuh namar ka jingïa biang bor jong baroh ar tylli ki team bad ki don ki khep ki khep ba kila pyrshang ban pynkhih jar hynrei ym shem lah satia bad dei ha ki minit kiba khatduh jong ka kylla miet kala ïoh ban pynkhih nyngkong ïa ka jar bad bteng biang tang ha ki minit kiba khatduh kala ïoh biang ban pynkhih jar bad kala pynlong ïa ka Weilyngkut Area ban pynliem ïa ka Krang Area da 2-0 kol.
Haba phai ka jingïalehkai jong ki samla kiba hapoh ka 35 snem ka rta kata ka Diengïei Area pyrshah ïa ka Sohïong Area kane ka jingïakhun ka ïa syriem hi kumjuh namar ba ym shem la don kiba lah ban pynkhih jar ha ka kylla step wat hapdeng ka jingsakhi ki paidbah nongkyrshan kiba la poi da ki hajar ngut bad dei tad ha ka kylla miet ba ka Sohïong Area ka la ïoh ban pynkhih jar haduh ar kol bad pynlong ïa ka ban rah ïa ka nam kum ka lahduh ha kane ka 1st Sohïong Constituency Knockout Football Tournament 2022
Ki kynhun ne ki team baroh kiba ïa shim bynta ha kane ka lympung ki don haduh 32 tylli bad ka khusnam na ka bynta ki nongjop ha kane ka knockout tournament ka long 50 hajar na ka bynta ki nongjop ha ka rta ba 35 snem shapoh katba kaba wan ba-ar ki ïoh 25 hajar bad na ka bynta ki nongjop ha ka 35 snem sha jrong ka long 30 hajar ïa ki nongjop bad 20 na ka bynta kiba wan ba-ar.
Ïa ki khusnam sha ki nongjop la aiti da u Bah HDR Lyngdoh uba long kum u kongsan bad u Bah Synshar Kupar Lyngdoh Thabah ha ka jingïa don lang bad ki nongkitkam ka UDP Sohïong Circle lem bad ki nongkitkam ka UDP Youth Wing, ka Sohïong Circle lem bad kiwei de ki nongïalam.
