Shillong, Nohprah 29 : Ka Rising CC ka la khur jingjop ha ka lympung ïalehkai kriket ba pynïaid ka Shillong Cricket Association (SCA) ka Shillong Cricket League 2022-23 da kaba pynliem da 30 ron pyrshah ïa ka Combine XI Laban Pyllun ha ka jingïalehka hynne ka sngi Palei.
Haba phai sha ka jingïalehkai, ka Rising CC kaba la jop ïa ka jingkynting pisa ka la kam trai ban tied nyngkong bad katei ka rai ba ka la shim ka la long kaba biang pura ïa ka kynhun ha kaba ka la kamai 123 ron bad duh noh 10 wicket ha ki 17.3 over. U Azim u la lah ban kamai 28 ron na ki 23 bol bad u Md farid u kamai 21 ron na ki 31 bol, katba kiba la khur wicket na bynta ka Combine XI Laban Pyllun ki kynthup u Reuban u ïoh 3 wicket ai kamai 21 ron ha ki 3.3 over bad u Nangsan u khur 3 wicket ai kamai 25 ron ha ki 4 over.
Haba wan beh ïa katei ka thong, ki rangtied ka Combine XI ki la pyrshang ban pyndep ïa ka thong hynrei kam shym la lah ban teh lakam ban pynneh wicket ha kaba ka la kynjoh tang sha ka 92 ron duh noh 10 wicket ha ki 15.5 over. Dei tang u Sunshine uba la kamai bun ron da 38 ron na ki 31 bol bud pat sa u Jason u kamai 16 ron na ki 28 bol.
Ki Rising CC ka la lah ban ïalehkai bha naduh ka jingkamai ron bad kawang bol ha kaba u Altaf marwei u khur 4 wicket ai kamai 19 ron ha ki 4 over bad u Bikash u khur 3 wicket ai kamai 14 ron ha ki 3.3 over. Ha kaba kut jong ka jingïalehkai la sam ïa ka khusnam Man of the Match ba la ïoh da u Altaf jong ka Rising CC uba kawang 4 over ai kamai 29 ron bad khur 4 wicket.
