Rung ka PFR Football Academy sha ka final, yn ïakhun pyrshah ïa ka North East United

Shillong, Nohprah 29 : Ka kynhun ïalehkai phutbol jong ka PFR Football Academy kaba dei kawei na ki shlem ai jnghikai ha ka liang ka jingïalehkai phutbol kaba don hangne ha nongbah Shillong, ka la ïoh rung sha ka phai jong ka lympung ïalehkai phutbol 6th Annual Swargadeo Sarbananda Singha National Level Invitation Tournament 2022 kaba long ha Dibrugarh Assam.
Ka PFR Football Academy ka la ïoh rung sha ka phainal hadien ba ka la pynliem ïa ka Manipur lyngba ka jingïashut tie-breaker hadien ba ki la ïakhaid ha ka jingïakhun. Kumta ka PFR Football Academy kan ïakhun pyrshah ïa ka North East United kaba dei ka reserved team ha ka phainal kaban long lashai ka sngi Thohdieng (30-12-2022) ha madan Chowkidinghee Dibrugarh ha ka por 6 baje janmiet.
Ka PFR ka la ïoh ban pynliem ruh ïa ka Kakopathar ha ka quarter final da 3-0 kol bad ha katei ka jingïakhun u Myntri Rangbah ka jylla Assam u Himata Biswas Sharma u la wan ban sakhi ïa ka jingïalehkai quarter final.
Ïa kane ka Team la lam khmat da u Amit Rai kum Head Coach, u Robin Nongrum kum u Assistant Coach bad u Franky Kharumnuid kum u Team Manager.
Ki rangïalehkai jong ka PFR kiban ïashim bynta ha katei ka lympung ki kynthup u Eben Warbah, Meban Dkhar, Albes Syngkli, Donald Tariang, Shanbor Thangkhiew, Albert Maring, Bantei Muktieh, Pynroy, Samlang Rympei, Mohan, Mewan Lyngdoh, u Wadskhem, Dlessing, Fleming Suting, Robi Maring, Closing Lyngshing, Daminot, Arki, Andy Suting bad u Rohit.