Shillong, Nohprah 17: Ka United Democratic Party [UDP] -Shillong City Youth Wing ka la pynhap pyrda noh ïa ka lympung kaba la tip da ka 1st Knock Out Football Tournament 2023 hynnin ka Sngi Saitjain ha kaba ïa ka namlahduh la ïohrah da ka kynhun lehkai Maduh FC.
Kumban shu pynkynmaw, ïa kane ka Football Tournament la sdang naduh 4 tarik Nohprah kaba la pynlong ha madan phutbol 3rd Ground, Polo. Ha ka sngi pynkut ïa kane ka lympung u Bah Kyrmen Shylla-Myntri ka sorkar jylla u la long kongsan ha ryngkat ka jingïadonglang u Bah Synshar Lyngdoh Thabah [MLA] kum u symbud kongsan, Kiwei pat kiba la wan sakhi ïa ka final ha katei ka sngi ki kynthup ïa u MLA ka Mawsynram Constituency- u Bah Olansingh Suin, Bah Pius Marwein -MLA ka Ranikor, Bah Eugeneson Lyngdoh President Shillong Sports Assiciation ki dkhot nongkitkam ka UDP-Shillong City Youth Wing lem bad kiwei kiwei kiba la ïoh bynta ban sam khusnam.
Ka jingthmu kaba hakhmat eh jong ka UDP-Shillong City Youth Wing haba pynlong ïa kane ka Tournament ka long shibynta ban ïalap pyrshah ïa u ‘drugs’ bad ruh ban saphriang ïa ka khubor sha ki samla ban kiar na u ne u jingdih ba pynsniew ym tang ïalade hynrei ïa ka imlang ka sahlang ruh. Ki nongpynïaid ki la buh ïa ka phang pdeng kaba ong “United Against Drugs, Deny Drugs, Embrace Life.”
Haba phai sha ka jingïaknieh namlahduh, ka jingïakhun ka la long hapdeng ka Maduh FC pyrshah ïa ka Thrive FC ha kaba ka Maduh FC ka la jop da 3-1 kol, kine ki kol la thep da u Terrance Jyrwa (57 & 68 minit) bad u Wanshwa Sohyun (66 minit). Na ka liang jong ka Thrive FC ka la ïoh ban pynphai shi kol na u M Shylla.
Ha ka jingsam khusnam, ïa ka Most Discipline team la khur da ka United Warrior-Lawmali. Ka nam Man of The Match la jop da u Terrance Jyrwa.
Nalor kine ki nongpynïaid ki la pynkup burom ruh da kaba ai khusnam sha ki dkhot ka Shillong Referee Society bad ruh ïa ki 16 tylli ki kynhun kiba la shimbynta ha kane ka lympung.
ïa ka nam Top Scorer la khur da u T Jyrwa u ba la thep 5 kol, Best Goal Keeper la jop da u M Suting. Player of The Tournament da u Aibiang Momin.
