Shillong, Nohprah 17: Kum shibynta ban kynmaw burom ïa u wei na ki Nongmihkhmat u ba dei u MDC bad MP barim, kata u Bah Jerlie E Tariang (Bam kwai ha dwar u Blei) ka synjuk jong ka Sainborlang Banjop Welfare Association [SBWA] ka la plie pyrda da ka lympung ïalehkai phutbol ïa kaba la ai kyrteng da ka 1st Jerlie E. Tariang Memorial Knock-Out Football Tournament 2023.
ïa kane ka lympung la pynlong ha madan phutbol Shonroy Basan School-Parmaw, Lummawbah.
Khyndiat, u Bah Jerlie E Tariang, u dei u MDC sha ka United Khasi Jaintia Hills Autonomous District Council ha u snem 1952 bad u la long ruh u MP sha ka ïing Dorbar Thawain Rajya Sabha naduh u snem 1984 haduh u snem 1990. U ne u Rangbah u la khlad noh na kane ka sla pyrthei ha u snem 9 tarik ïaïong 2015.
Ha ka sngi u Bah Nathaniel Thangkhiew-Basan Raid-Sawkur Nongkseh-Hima Mylliem u la wan kum u Kongsan u ba la plie pyrda ïa kane ka lympung ha katei ka madan. Kiwei pat kiba la don ryngkat ha kane ka sngi ki kynthup ïa ki khun ki ksiew Bah Jerlie E Tariang (Bam kwai ha dwar Blei), Rangbah Shnong jong ka Lummawbah-Everest Thangkhiew, ki nongïalam bad nongkitkam ka Association kiba kynthup ïa u Bah Balajied Kharmalki President SBWA, u Bah Gilbert Laloo Chief adviser ka Association lem bad kiwei pat.
Ha kane ka sngi shuwa ban sdang ïa ka jingïalehkai la ïoh jingkren lyngkot na i Dr Badap War khun Bah Jerlie E Tariang (Bam Kwai ha Dwar Blei), na u Rangbah Shnong ka Lummawbah bad khadduh na u Bah N. Thangkhiew u Kongsan ha kane ka sngi.
Haba ai jingkren ha kane ka sngi, na ka liang jong u Bah Thangkhiew u la ai khublie ïa ka synjuk kaba la shim ïa ka jingkitkhlieh ban pynlong ïa kane ka lympung bad u la kyntu ïa ki samla ïalehkai kiba shimbynta ha kane ka lympung ba kim dei ban duh mynsiem. “Kane ka dei ka lad ïa phi, wat lada ka dang dei tang ka shnong ba rit hynrei kynmaw ba bun ki player ba pawnam ki sdang na i ba rit hynrei lyngba ka jingtrei shitom ki poi sha ka thong,” la bynrap u Bah Thangkhiew shuwa ba un pynban ban sdang ïa ka lympung.
La plie pyrda ïa ka jingïalehkai hapdeng ka Friends United kaba ïakhun pyrshah ïa ka Shonroy Basan Higher Secondary School.
Haba phai sha ka jingïakhun ka Shonroy Basan Higher Secondary School ka la khur ïa ka namjop da kaba pynliem 2 kol ïa ka Friends United ban jam sha ka wat kaba bud jong kane ka lympung.
