Shillong, Jymmang 14 : U nongïalam ka BJP bad MDC ka Tura, u Bernard N Marak ha ka sngi U Blei u la kyntu ïa u Myntri Rangbah ka Jylla, Conrad K Sangma ban sangeh noh ka jingkyndang ïa ki briew kiba duk ha Diringga tang namar ba ki kyrshan ïa ka party BJP ha ka elekshon MLA ba dang shu dep.
“Phi dei ban pynsangeh noh ban kyndang ïa ki longiing kiba duk ha Diringga tang namar ba ki kyrshan ïa ka BJP ha ka elekshon MLA ba la dep. U John Barla uba la leit ban jngoh ïa kane ka shnong u la ong ba dei ban sangeh noh ïa ka jingkyndang hynrei tang shu thaw ïa ka sorkar, ka jingkyndang ka la sdang biang, ka jingpynlip bording ka la sdang bad ka jingkyrduh um ka la sdang kiba dei ki dak ki shin jong ka jingbym lah treikam ka sorkar,” ong u Marak ha ka shithi sha u Myntri Rangbah uba dei ruh u MLA ka South Tura.
Nalorkata, u ong ruh ba ka Tura kadei ka headquarter jong ka Garo Hills bad ki don ruh shibun ki ishu kiba donkam ban pynbeit mardor.
Shuh shuh u Marak u la ong ruh ba ka sorkar pdeng ka la ai shibun ka pisa sha ka jylla ban pynbiang ïa ka bording, ka um, ki surok bad kiwei kiwei ki jingdonkam hynrei tang khyndiat ki jingkylla.
“Nga kwah ruh ban kdew hangne ba nalor ka jingkhah khah ka jingpynlip bording, kam ju don pat ka jingduna ha ka bai bording, hynrei kaba la nang kiew pat wat ha ki longiing BPL jong ki longiing ba duk. Phi dei ban shimkhia ïa kine ki ishu kiba ktah ïa ki duk ki suk bad ka jylla baroh kawei,” u la ong.
Ha kajuh ka por utei u nongïalam ka BJP u la kyntu ruh ïa u Myntri Rangbah ka jylla ban shimkhïa ïa ka ishu kyrduh um kaba la pynbitar ïa ki nongshong shnong ka rilum Garo baroh kawei. “Ngi don ïa ki pipe um kiba la pynpoi haduh ki longiing hynrei ka jingkhmih lynti ban poi ka um ka dang jngai la ka long ha Tura ne wat ha ki shnong kyndong,” u la bynrap biang.
Nalorkata u kam ruh ba ka sorkar pdeng ka la mynjur ban bei tyngka na ka bynta ka Jal Jeevan Mission bad kiwei kiwei kum ka jingpynneh pynsah ïa ki khlap ki btap bad ki tyllong um hynrei u la ong ba katei ka song kam pat poi sha ki Nokma bad ki komiti shnong. Kumta, halor kane u ong ba kan ktah ïa ki tyllong um khamtam na ka jingpyntrei ïa ka rep jhum bad ruh sha ka jingnang jur ka jingkyrduh um.
Utei u heh BJP u la kdew ruh ïa bun ki phang kiba ïadei wat bad ka koit ka khiah nalor kiwei kiwei ki skim kiba wan na ka sorkar pdeng.
