Shillong, Jymmang 14: Ka Confedeartion of Ri Bhoi People (CoRP) Western Zone ka sngewkhia jur ïa ka jingdusmon ki briew ban ber dawai ha Wahkhri ban pynïap dusmon ïa ki dohkha dohum haduh ba katei ka wah ka la sma iwtung na ka jingpyiut ki dohum kha bad ka dawa ban kem bad pynshitom ïa ki briew ba donkti ber dawai ha ka Wahkri ha ki khyndiat sngi
Haba kren bad u President ka CoRP-Western Zone u bah L Lapang ula ong, katei ka jingjia ka dei na ka jingkhein sting ki nongïalam shnong ban ai lad ïa ki paidbah ban shoh kharu wat hadien ba la mana pyrshah ba ym bit shuh ban shoh kharu, thang bom ne ber dawai ha katei ka wah namar ka pynduh jait ïa ki dohum dohwah.
U Bah Lapang ula ïathuh ba kane jingjia ka la jia naduh 10 tarik mynta u bnai kaba la sdang na ki thain Warmawsaw-Domphlang sharum ter ter haduh ka jaka ba kynduh ka wahkri bad ka Khrisynia ba wan na West Khasi hills bad bynrap ba ym lah ban ngeit na ka jingshoh kharu kin ïap lut ki dohkha lada ym dei na ka jingbret dawai dusmon ki briew.
“Ka shnong Mawdem bad kiwei ki shnong ba marjan ki la mana tyngeh ba ym dei ban thang bom ne ai dawai ha Wahkri ban ïada ïa ki dohum bad khamtam ki kha masi namar ki don tang ha katei jaka, kiba heh haduh 100 kilo hynrei na kane ka jingai dawai ki dohkha ki la ïap lut ha Wahkhri, u ïathuh ka shnong Mawdem ka la mana ruh ïa ki paidhah ban leit tam doh ha kane ka jingjia” u la ong.
Ula bynrap kane ka jingjia ka lah ban dei na jingshoh kharu katto katne ki paidbah na ki thain Warmawsaw bad Domphlang na Ri Bhoi, ki shim kabu pat ki briew ban bret dawai bad ym lah ban tip dei na Bhoi ne na West namar katei ka wah ka long kum u pud ka Ri Bhoi bad West Khasi.
“Kane ka jingjia ka long kum ka tamasa bah ban leit tam dohkha ha Wahkhri ïa ki paidbah ka thain ri bhoi sepngi ban tam doh bad don kiba kit doh da ki Belero Pickup da ki hajar kilo, ki paidbah ki la kit doh da ki tone na wahkhri, kata tang kiba heh ïa kiba rit ym don shuh ba peit” la ong u bah Lapang bad kyntu ïa ki pulit bad ki bor distict ban shimkhia halor kane ka jingjia khnang ba kan ym jia shuh hadien habud.
