Leh burom ka Haven’s Cove Nature & EPS ïa ka samla Rupda Lato ka ban mihkhmat sha ka Miss Aura International

Jowai, Jymmang 14: Ka Haven’s Cove Nature and Environment Protection Society hynnin ka sngi saitjaiñ kala pynkup burom ïaka samla Rupda Lato kaba na Jowai halor ka jingshah jied jong ka ban shim bynta haka jingïakop thei bhabriew ba tip kum ka Aura International ka ban sa pynlong mynta u snem ha Antalya, Turkey.
Ha kane ka jingpynkup burom u Wanphrang Gassah Incharge Librarian Jowai ula long kum u kongsan, u Dr. Evarist Myrsing kum u symbud kongsan ryngkat ka jingdonlang u Songashim Runsung u nongjop ïaka Rubaru Mr.India, ki riew ryngbah, kiba haïing hasem kane ka samla bad ki nongshah khot sngewbha.
U symbud kongsan Dr. Evarist Myrsing haba ïaroh ïaka jingshim kane ka society ïaka sienjam ban pynkup burom ïa kane ka thei samla, ula kyntu ruh ïa kane ka thei samla ba kan long kaba ïeng skhem bad shaniah ha lade nangta ban ïaid ruh shakhmat ïa kano kano ka jingthrang jingangnud.
Ula bynrap ruh da kaba ong “Ka jingim dei ka jingai jong u Blei kaba wan tang shisien, na kata ka daw donkam ban im da kaba pyrkhat janai naka bynta ban wanrah nam rah burom iaka ïing ka sem ka Jylla bad ka Ri”.
U Wanphrang Gassah pat kum u kongsan ula kitbok kit rwiang ïa kane ka samla bad kyrmen ruh ba kan wanphai ha ryngkat ka jingwanrah nam iaka Jylla bad ka Ri.
Ha kajuh ka por u sngew sarong ruh namar ba kane ka samla wym tang ba ka wanrah ïaka nam ka burom hynrei ka jingïaid jong ka kala long ruh ka nuksa ïa kiwei pat ki khun samla.
Naka liang kane ka samla pat haba ïathuh ïaka jingïaid lynti, ka ong ba kam long kaba suk ïaka ban pyndep ïa baroh ki bynta ba donkam shwa ba kan poi ha kane ka thong hynrei kam shem la randien pat namar ba ka don iaka jingthrang.
Kumta ka sngew sarong ba ka ïoh ïaka lad ban leit shim bynta ha ka rynsan ba heh tam ha Turkey, da kaba ai ruh ka jingiaroh ba nyngkong eh ïa U Blei uba ka shaniah haka jingïaid lynti jong ka.
Bad haba pan jingkyrshan naki paidbah ka ong ba kam long eh ka jingkyrshan daka pisa, hynrei tang lada ki briew ki pynpaw ba ki sngew sarong iaka bad ai ruh ki kyntien kitbok kata dei kaba kongsan bad ba pynkmen tam ïaka nga.
Ka Rupda Lato kala ïoh pdiang ïaka jingpynkup burom na u President ka Haven’s Cove Nature and Environment Protection Society u Bari Laloo bad ruh naki nongïalam ka Kyrmen Foundation haka jingïalang ba pynïaid daka kong Simi Khongthiang.