Nongpoh, Nailar, 02: Ka shnong Santipur ha ka thaiñ Byrnihat ha Ri Bhoi District ryngkat ki trai jaka mynta ka sngi ki la pynpaw ïa ka jingpyrshah jur, kaba dei halor ka jingkynnoh ba kawei ka Longïing ka la wan kurup jubor ïa ki jaka ki nongshong shnong ha Santipur.
Haba ïa kren bad ki nongthoh khubor mynta ka sngi, u rangbah shnong ka Santipur, Artish Marak bad uwei na ki trai jaka, u Never Momin, ki la kynnoh ba ka Longïing jongnka Sina Marak bad ka Mira Marak kiba dei ki trai ka Romana kawei na ki jaka pyni phlim ha Byrnihat ki la wan klur jubor ïa ki jaka jong ki nongshong shnong ba la tam pud wat sha ki jaka jong ki nongshong shnong ka Shnong Santipur.
Ki la ïathuh ba ha jingshisha ki don ïa ka jaka ha katei ka thaiñ Santipur, hynrei kaba sngewlyngngoh ka long ba ki mut wan klun jubor ruh wat ïa ki jaka jongki nongshong shnong bad pyndonkam ruh da ki bor Pulit ban pyntieng ïa ki trai jaka ba shah klun jaka.
Ki la ong ruh kum ki trai jaka ki pyrshah jur halor kane ka jingwan thombor ïa ki jaka, ha kaba ma ki ruh ki don la ki dulir ne ki kot ki sla ban pynshisha ïa la ki jong ki jaka ki puta bad kaba sngewsih ka long ba tang ban ioh ïa ki jaka ka la phah wan da ki bor pulit ban pyntieng ïa ki trai jaka.
Namarkata, na ka liang jong ka shnong bad ki trai jaka kin nym ailad ba katei ka longïing kan shu wan klun jubor ïa ki jaka jongki, ba ki la rep ïa ki jingthung jingtp bad ki la rai ruh ban pyrshah wat lada dei ban ïaid lyngba ki lynti ka aiñ namar kum ki trai jaka ki ieng skhem halor ka nongrim namar ki don la ki jong ki kot ki sla ne ki dulir jaka ba ki long trai halor kitei ki jaka, ki la bynrap.
