Shillong, Jymmang, 16: Ka Confederation of Ribhoi People ha ka sngi Baar hapoh ka jingïalam jong u President u Bah Bandari Ryntathiang ka la pan jingpynshai na u Syiem jong ka Hima Mylliem u Paiem Ainam Manik Syiem halor ka jingpyrshah jong ka Raid Kharpati ïa ki nongïalam Sengbhalang ban bat ïa ka kam rangbah shnong wat hadien ba la jied bad la mon hi da ki paidbah nongshong shnong.
Ki arngut ki Rangbah Shnong kiba la shah ujor ha u Acting Syiem jong ka Raid Kharpati u Bah RR Kleiñ ki long u Bah Belarius Rongpeit uba long u Rangbah shnong jong ka shnong Umshakait uba dei ruh u dkhot barim jong ka seng Hynniewtrep Achik National Movement bad uba la long mynta u dkhot jong ka Confederation of Ribhoi People, katba uwei pat u dei u Bah Jaran Hamse uba long u Rangbah Shnong jong ka shnong Khamar.
Ha ka jingïakren bad ki lad pathai khubor u Bah Ryntathiang u la ïathuh ba katkum ka jingpynshai na ka Ophis jong ka Hima Mylliem, la ong ba kam don satia kano kano ka ain kaba khang ïa ki dkhot ne ïa ki nongïalam jong ki sengbhalang ban long ki Rangbah Shnong hapoh kano kano ka shnong.
