Shillong, Jymmang, 16: Ha ka jingrakhe ïa ka Sngi Seng ïa ka Jylla Sikkim, la pynlong ïa ka prokram deiriti mynta ka sngi ha Raj Bhavan Shillong ha kaba u Lat ka jylla Meghalaya, u Phagu Chauhan u la plie ïa ka jingïalang kum u Kongsan, ryngkat ka jingdonlang u Myntri ha ka Kynhun Sorkar jong ka Jylla Meghalaya, u Bah A.L Hek.
Ïa kane ka prokram la pynlong da ka Indian Council for Cultural Relations (ICCR) Shillong ha ka jingïatreilang bad ka Tnat Arts and Culture, Sorkar Meghalaya.
Ha ka prokram deiriti la don ka jingpyni ïa ki tamasa bapher bapher da ka Pooja Bareli bad ka kynhun jong ka, ka sarod vandan na u barikor ba pawnam, u Tarun Kalita bad ka jingshad Khasi tynrai, ka Shad Mastieh.
Ha ka jingai jingkren ha ka jingïalang, u Commissioner bad Secretary sha u Lat, Dr B D R Tiwari, u la batai ïa ki nongïashim bynta shaphang ki jingjop jong ka Sikkim. U la ai jingkren ruh shaphang ka histori jong ka Sikkim, naduh ka jingïaid lynti kum ka Hima haduh ba kan da long ka Jylla kaba 22 jong ka ri ha ka 16 tarik Jymmang, 1975.
U Lat ka jylla u la thung ruh san tylli ki tynrai dieng soh ha phyllaw jong ka Raj Bhavan kum shi bynta kane ka jingïalang.
