Nongstoiñ, Jymmang, 16: Ka HYC Mawshynrut Circle hapoh ka jingïalam u samla Losbingnel Lyngkhoi ka la leit jurip kyndit ïa ka iew Riangdo jong ka Hima, ha kaba ka la lap ïa ki jingduna ha kiba bun ki liang, kum ka jingbym biang ki jaka theh ñiut, ka jingbym pynlang bha bad bym don ki jaka ba biang ban thang ïa ki jaboh jabaiñ. Kane ka wanrah jingsma iwtung ïa ka iew bad ka ktah ruh ïa ka koit ka khiah ki nongwan iew.
Ka seng ka la lap ruh ïa ka jingbym don ki jingkhang ha ki sem dukan bad ha ka jingdum jong ka miet, ka pynlong ïa ki nongleh kam sniew ba kin shim. Kane ka buh jingtieng jingsmiej bad jingma ïa ki briew kiba ïaid lyngba ka iew khamtam ynda la kham miet.
Kumta ka seng ka sngew ba ka Hima ka dei ban buh da ki kynja light kum ki solar light, khnang ba ki paidbah khamtam ki longkmie bad ki khynnah kynthei ba ïaid lyngba ka iew, kin kham sngew shngaiñ khamtam ha ka por ba dum por janmiet.
Ka seng ka la khmih bniah bha ruh ki lynti ïaid kjat, ha kaba ki long kiba khohruh khohram bha. Kane ruh ka lah ban wanrah jingmynsaw khamtam ïa ki riew tynmen bad ki khunlung khynnah khamtam ha ki por lyiur.
Halor kine kiei kiei, ka seng hynne ka sngi ka la leit ban kyrpad rit ïa u Syiem ka Hima da ka jingthoh, ba un shimkhia lem ïa kane ka jingdawa, kaba long ruh na ka bynta ka bha ka miat, ka suk ka saiñ jong ki paidbah bad ka burom ruh ïa u Syiem ka Hima.
