Mawkyrwat, Jymmang, 16: Ka Nineset Secondary School, mynta ka sngi ha ka jingïalehkai Semi Final jong ki khynnah kynthei ba 12 snem ka la pynliem noh pyrshah ïa ka Little Star Higher Secondary School, Mawkyrwat da 6 – 0 kol ha ka lympung ïalehkai jong ka Chief Minister’s Mawkyrwat Block Level Under-12 Years Football Tournament 2023 ba la pynïaid da ka ophis jong u District Sports Officer, South West Khasi Hills District hapoh madan Saitsnad, Mawlangwir, South West Khasi Hills District.
Haba phai ha ka jingïalehkai, baroh ar tylli ki kynhun ki la ïalehkai bha namar tang ban ïoh ban pynrung ïa la ka kynhun sha ka phainal hynrei hapdeng ka jingïalehkai ka Nineset SS ka la ïoh ban khur ïa ka nam jop bad rung sha ka phainak lyngba ki 6 tylli ki kol kata na ka Badaphun Lyngkhoi ha ka minit kaba 6 bad 9, na ka Deiphiwansara ha ka minit kaba 16 bad 23 bad na ka Ribakmen Wanniang ha ka minit kaba 28 bad 41.
Ha ka jingïalehkai kaba dei hapdeng ka Rising Secondary School, Sohkhyllam bad ka Nonglang Secondary School ïa ka nam jop la rah da ka Rising SS ha kaba ka la jop lyngba ka Tie Breaker da 4 – 2 kol namar ha ka Regular Time bad ka Extra Time kim shym la ïoh ban ïa pynkhih jar wat kawei ruh.
Haba wan sha ka jingïalehkai jong ki khynnah shynrang kiba 12 snem kaba dei hapdeng ka Rangjadong Sports Club pyrshah ïa ka St. Vianney’s English School, Mawkyrwat ïa ka nam jop la rah da ka Rangjadong Sports Club lyngba ka jingïoh ban thep da 6 – 1 kol kata na u Bawanpynskhem Nongmor ha ka minit kaba 7 bad, 15 bad 21, na u Nehskhemlang Thongni ha ka minit kaba 17 bad na u Pynïohborlang Syiemlieh ha ka minit kaba 35 bad 43 katba ïa ka shi kol jong ka St. Vianney’s English School, Mawkyrwat la ïoh ban thep da u Almiky Lyngdoh ha ka minit kaba 30 lyngba ka Penalty.
Ha ka jingïalehkai semi final kaba khadduh, hapdeng ka Mawbidong Presbyterian Upper Primary School bad ka Pyndenkenshliah Lower & Upper Primary School ïa ka nam jop la rah da Pyndenkenshliah LP & UP School da 1 – 0 kol ha kaba ïa kane ka kol la thep da u Rockinson Kharsyiemïong ha ka minit kaba 57 kaba dei ha ka extra time.
Namarkata, ki kynhun kiba la poi sha ka phainal ki ban sa ïa khun ha ka 17 tarik u Jymmang, 2023 ki long ka Nineset Secondary School kan sa ïa khun pyrshah ïa ka Rising Secondary School, Sohkhyllam jong ki khynnah kynthei ka ban long ha ka por 10 baje mynstep bad ka Rangjadong Sports Club kan sa ïa khun pyrshah ïa ka Pyndenkenshliah Lower & Upper Primary School jong ki khynnah shynrang ha ka por 11:30 mynsngi.
