Shillong, Nailur, 12: Ka Hill State Peoples Democratic Party (HSPDP) ha ka sngi Baar ka la aiti da ka dorkhas ha u Myntri Rangbah ka Jylla u Conrad Kongkal Sangma da kaba kyntu ïa ka Sorkar Meghalaya ryngkat bad ki lai tylli ki Autonomous District Council (ADC) ba kin ym ailad ban pyntreikam ïa ka Uniform Civil Code (UCC) ha kane ka jylla Meghalaya.
Ha ka dorkhas ba la soi da u President ka party u Bah KP Pangniang bad u General Secretary u Bah Panborlang L. Ryntathiang, ka HSPDP ka la ong, “ka party ka sngewkhia lada ka Sorkar Pdeng ka ïaid shakhmat ban pyntreikam ïa ka UCC ha ka jylla Meghalaya. Ka party ka ieng ha ka nongrim, namarba ka Jylla Meghalaya ka don la ka jong ka jinglong ba kyrpang, ha kaba ïadei bad ki riti ki dustur, ki jingïoh pateng ha ka spah ka phew bad kiwei kiwei, ka jingpyntreikam ïa ka UCC kan pynjngut noh ïa ki kyndon bad ki jingïada ba la ai da ka riti synshar jong ka ri hapoh ka Article 29 bad 244 ryngkat bad ka Khyrnit Bahynriew.”
