Shillong, Nailur 12 : Ka kyrtong jong ka BJP na Shella constituency, Kong Arena Hynñiewta hynne ka sngi ka la pynbna ba kan iehnoh ïa ka party BJP bad ba kan leit ïasoh lang noh sha ka National People’s Party (NPP).
Lah ban kdew hangne ba ka Kong Areana ka la wan ba lai ha ka elekshon MLA ba dang shu lah shen hynriew bnai mynshwa da kaba ïoh kumba 3000 vote duna, kata hadien ka Kong Grace Mary Kharpuri kyrtong ka NPP kaba wan ba ar da ki 12,840 vote.
Katei ka longkmie ka la wan ruh ban shim bynta ha ka jingïalang ba la pynlong da ka NPP Mawsynram ban pdiang burom ïa u Bah HM Shangpliang, MLA barim bad kyrtong ka BJP na Mawsynram ha kane ka elekshon ba la dep.
Haba kren bad ki lad pathai khubor, ka Kong Arena ka la ong ba kam don eiei pyrshah ïa ka party hynrei ka daw hi ka long ba ka kham noh ka mon sha ka NPP namarba katei ka party ka don ai ki nongïalam kiba tbit.
“Nga thmu ban pynïasoh lang noh lashai ka sngi (13tarik Nailur) ryngkat bad i Bah HM Shangpliang sha ka NPP,” ka la ong.
Halor ka jingkylli, la ka la don neem pat ka jingïakren bad ka kyrtong MLA jong ka NPP Kong Grace haba ïadei bad ka jingwan pynïasoh jongka sha ka party, katei ka longkmie ka la ong ba haduh mynta kam pat don kano kano hynrei ka pynpaw pat ïa ka jingkhmih lynti ba nangne shakhmat kin sa ïoh ban ïatrei lang ryngkat ryngkat ha ka party.
