Shillong, Nailur 12 : U Bah P.T.Sawkmie, MLA barim ha ka kyrwoh khubor ba la pyllait mynta ka sngi u la kyrpad ïa ka Meghalaya College Teacher’s Association (MCTA) ba kan phaidien ban pyrkhat bha ïa ka jingpyrshah jong ka halor ka jingpyntreikam ïa ka NEP 2020.
“Ki kmie ki kpa bad ki samla pule ki sah ha ka umdum, namarba bun kiwei ki class ki lah long hynrei ki 1 semester kat haduh mynta kim pat ioh sdang satia ia ki klass jongki,” ong u bah Sawkmie.
U la bynrap, “Kiba bun hi kiba shah ktah ki dei ki samla pule, namarkata shimet nga kyrpad ïa ka Association ban kin pyrkhat bha biang na ka bynta ka jingmyntoi ki samla.”
U ong ruh, “Ngi tip ba ka jingbym ïa sngewthuh jingmut hapdeng u vice chancellor bad ka MCTA, ki ban shah ktah hi ki dei ki samla pule jong ka jylla bad baroh ki kmie ki kpa ki sngewkhia ïa la ki jong ki khun. Khamtam ba kiwei ki jylla ha ka ri ki la jam shakhmat ban pyntreikam ïa ka NEP, katba ka jylla jong ngi pat ka dangsahteng.”
