Kyntu ka VPP ban pynjlan ïa ka Assembly

Shillong, Nailur 12: Ka Parliamentary Party jong ka Seng VPP, ka la kyntu ïa u Shongknor ka Meghalaya Legislative Assembly ba un pynjlan ïa ka jingïashong Dorbar na ka san sngi ba la buh sa katto katne sngi.
U Secretary ka PP, u Bah HS Kharpran, ha ka shithi ba u la phah sha u Shongknor, u Thomas A. Sangma, u la ong ba ka jingïalang jong ka PP kaba la long ha ka 31 tarik u Nailar, ka la ïakren bha ïa kane ka kam bad ka sngew ba ka jingbuh por ka Business Advisory Committee tan san sngi ka lyngkot palat. Kumta ka la rai ba kyntu ïa u Shongknor ka pynjlan sa katto katne sngi, khnang ba ki dkhot kin ïoh ïashim bynta lyngba ki Resolution, ki Motion bad kiwei kiwei de khnang ban ïoh ïatai khambha ïa ki mat kibaktah ïa ki paidbah bad ïa ka jylla.