Nongpoh, K’lyngkot 16: Tang hadien ba la ioh jingtip ba ka sorkar jylla lyngba ka tnad Meghalaya Mineral Development Corporation Limited (MMDCL) ka la ai wai sha ki riew shimet ban shna Petrol Pump bad ka Resort ïa katei ka jaka kaba don ha Mawsmai, Ri Bhoi District, ka Federation of Khasi Jaintia & Garo People (FKJGP), North Khasi Hills District mynta ka sngi ka la leit ban jurip bad la lap shisha ba ki la don ki dak ki shin ba la pynmadan ban shna ïa katei ka petrol pump bad ka Resort.
Haba leit ban jurip ïa katei ka jaka sorkar, la ïalamm da u President ka FKJGP, North Khasi Hills District Unit, u Bah Lui Star Lyngdoh ryngkat k ajigndon lang u Senior Vice President, u Bah Lumlang Mawnai lem bad ki dkhot na ka Ditrict bad ki Circle.
Ka seng ka la leit ruh ban jurip ïa katei ka jaka, ha kaba mynshwa la don ka jingmang ban shna kum ka jaka pynlong dewiong (Coal depot) bad mynta ka sokar lyngba ka tnad Meghalaya Mineral Development Corporation Limited (MMDCL) ka la shim kabu pynban ban ai wai sha ki riew shimet na ka bynta ban tei ïa ka petrol pump bad ka Resort ki riew shimet.
Haba kren bad ki Nongthoh Khubor, u President ka FKJGP, North Khasi Hills District Unit, u Bah Lui Star Lyngdoh, u la ong ba ka seng ka sngewkhia halor kane ka jingthmu ban ai wai ïa katei ka jaka sha ki riew shimet bad khamtam kumba la ioh lum jingtip la ong ba la ai wai sha ki briew kiba na ka jylla Assam.
Halor kane ka bynta, u la ong ruh ba ka seng ka pyrshah jur ban ai wai ïa katei ka jaka, ha kaba ka sorkar ha ka jingshisha ka la dei ban tei da ki jaka pule ne da ki ingbasa (guest House) ban pynsuk ïa ki paidbah ka jylla khamtam kiba leit shah sumar, namar katei ka jaka ka don hajan ka Assam badb ka seng ka sngewlyngngoh ba ka sorkar ka klo pyban ban ai wai sha ki riew shimet kaba long ka jingmyntoi sha ki riew shimet bad ym sha ki paidbah ka jylla.
Namarkata, na ka liang ka seng ka kyntu ïa ka sorkar lyngba ka tnad Meghalaya Mineral Development Corporation Limited (MMDCL) ba ka dei ban pyndam noh ïa katei ka jingai wai sha ki riew shimet bad ha ka jaka ban shna da ka petrol pump ne ka ingsahbasa ki riew shimet dei ban shna da ki jingtei kiba ai jingmyntoi la ka long ban kyntiew ïa ka pule ka puthi ne kiwei kiba ai jingmyntoi lang sha u paidbah ka jylla khamtam ka ingbasa ka ban ïarap ïa ki paidbah ha ka pang ka shitom lada ki leit shah sumar sha Assam, u la bynrap.
