24 kynta ai por ka VPP ban thung biang ïa ki ophisar ha Lokayukta, dawa weng ïa ki Chairman

Shillong, K’lyngkot 16: Ka Voice of the People Party (VPP) mynta ka sngi ka la ai ara tylli ki shithi sha u Myntri Rangbah ka jylla, u Conrad Sangma. Kawei ban aipor 24 kynta ban thung biang ïa ki 3 ngut ki ophisar tohkit ka Lokayukta, kiba la shah weng kam noh hadien ba ki la lap ia ki kam bamsap ha kaba pyntrei ia ka projek jong ka GHADC ba la pyntrei da u Sanjay Sangma, MLA ka Mahendraganj uba long ruh u kynum jong u Myntri Rangbah.
Kawei pat kadei halor ka jingdawa ban weng noh ïa baroh ki kam Chairman kiba la thung ha ki Board, ki Corporation bapher bapher jong ka jylla.
Ha ka shithi ba la phah sha u Myntri Rangbah, u General Secretary ka VPP u Dr Ricky AJ Syngkon u la ong ba kum ka party ka sngew khia haduh katta katta ïa ka jingweng ba syndet syndet bad pynkheiñ ïa ka jingïateh (terms of contract) kumba la paw ha ki lad pathai khubor.
“Kane ka jingleh jong ka sorkar ka pynpaw ba ka don kaei kaei kaba sha lyndet bad kane ka wanrah ruh ïa ka jingduh jingshaniah u paidbah ha ka ophis ka Lokayukta,” u la ong.
“Kum ka party ngi ai por ïa ka sorkar 24 kynta ban thungkam biang ïa ki tad haduh ba ka samoi treikam jong ki kan kut lada kane ka jingdawa jong ngi kam urlong ngin pynlong ïa ka jingïakhih paidbah kaba tyngeh,” u la bynrap.
Lah ban kdew hangne ba ka sorkar jylla ka la weng ïa ki  laingut ki Ophisar jong ka ophis Lokayukta kiba la pynlong ka jingtohkit halor ka kam bamsap u kynum u Myntri Rangbah ka jylla u Sanjay Sangma kine ki ophisar kiba shah weng ki kynthup ïa u Director of Inquiry and Prosecution u Bah J. Rymmai uba long u IPS ophisar barim ka jylla, ryngkat bad ki Enquiry-cum-Investigating Officers kiba kynthup ia u R. Pde bad u Anil K. Sangma.
Lah ban kdew hangne ba na ka liang ka NPP kaba ïalam ïa ka sorkar, ka la kyntait ïa kane ka jingkynnoh ka VPP da kaba ong ba ki kyndon treikam jong ka Lokayukta kim shah ïa kine ki opgisar ban don ha ka jingtreikam, hynrei la shut hung shipor ïa ki ha ka kam.
U Bah HM Shangpliang, Nongaiktien ka Party NPP, u la iathuh ba ha ka jaka jong kitei ki lai ngut ba la wengkam,ka sorkar ka la thung thymmai ïa u BahIW Ingty, IAS kum u Director of Inquiry and Prosecution ryngkat bad lain gut ki ophisar kiba kynthup ïa u Chalang G. Momin, u John C Sangma bad u Bah Banteilang Diengngan. U Bah Hilamaya u la kyntait ruh ba u Myntri Rangbah ka sorkar u u mushlia bad ka jingtreikam ka Lokayukta.
Kawei pat ka shhiti bha la ai sha u Myntri Rangbah ka la dawa ba ka sorkar jylla ka dei ban weng lut plaiñ ïa baroh ki political appointees ne ki nongïalam ki seng saiñ bad ki kyrtong ba shah rem election na ka kam Chairman, Co-chairman, Vice Chairman bad kiwei kiwei kiba ka sorkar ka la thung ha ki Board, ki Commission, Corporation bad kiwei kiwei ki tnat treikam da kaba ong ba kane ka dei tang ka jingpynlut phut ïa ka pisa u paidbah ha ki kam bym ai jingmyntoi wat tang shisapit ruh ïa u paidbah ka jylla.
Ha kane ka shithi, u General Secretary ka VPP u Dr Ricky AJ Syngkon u la ong ba kane ka jingleh ka sorkar ka sorkar ka long ka kam pynlut phut bym phoida.
“Kine ki political appointees ki long tang u soh kthang ïa ki paidbah bad ka long ka jingpynlut phut ha ki kam bym phoida ïa ka pisa u paidbah namar kum ka sorkar ka la pheil ban ai ïa ka jingshakri kaba dei sha u paidbah,” u la ong.
“Kum ka party ngi dawa ba dei ban weng noh mardor ïa kine ki political appointees kiba ka sorkar ka la thung,” u la bynrap.