Shillong, K’lyngkot, 16: Ka Hynñiewtrep Integrated Territorial Organization (HITO) ha ka sngi Baar ka la pan jingpynshai na u Myntri ka tnat Sports and Youth Affairs jong ka Sorkar Jylla u Bah Shakliar Warjri hadien ba la saphriang ki video ha ka rynsan jong ka social media ba ki khynnah kiba ïashim bynta ha ka sngi sdang jong ka Meghalaya Games 2024 ha Tura ha ka Lah Sngi u Blei ki ïoh bam pynban tang da u chip, u samosa, ki biscuit ki bym pynkdang eiei.
Ha ka dorkhas ba ka seng ka la phah sha u Myntri ka la dawa ba dei ban thung ïa ka jingtohkit bad dawa ruh ïa ka jingpynshai halor ka jingbym biang ka rukom ai bam ha ka Meghalaya Games 2024
“Ka Hynñiewtrep Integrated Territorial Organization (HITO) ka kwah ban pynpaw ïa ka jingsngewkhia halor ka jingsam bam sha ki nongïalehkai kiba ïashim bynta ha ka Meghalaya Games kumba la ïohi ha ki lad pathai khubor. Ka rukom ai jingbam ka la wanrah ïa ka jingbuh jingkylli ïa ka tnat Sports jong ka Sorkar Jylla,” la ong ka dorkhas.
Ka seng ka la buh khyndai tylli ki jingkylli ïa ka tnat Sports ha kane ka dorkhas.
“Balei ka jingai bam ïa ki nongïalehkai kam long kaba biang? Balei la ai sha ki nongïalehkai tang da ki jingbam kum u Samosa, u Chip, ki Biskit bad kiwei kiwei ki bym tei sati ïa ka bormet bad ki jingbam kiba bha, kiba lah ban pdiang da ki nongïalehkai? Ka Sorkar ka la mang pisa palat 23 klur na ka bynta kane ka lympung ïalehkai, hynrei ka tnat ba dei peit bad ki bor pynïaid kim shym la lah ban ai ïa ka bam ka biang ïa ki nongïalehkai, balei ka jia kumne? Mano ban shim jingkitkhlieh na ka bynta ka jingpynïaid ïa ka jingïalehkai? Mano ban shim jingkitkhlieh ban peit ïa ka bam ka dih na ka bynta ki nongïalehkai bad ïa ki nongïashim bynta? Mano ki briew kiba shim jingkitkhlieh na ka bynta ka jingbym biang ka rukom pynïaid? Hato ka Sorkar ka la shim neem ïa ki lad ki lynti kiba biang ban pynthikna ïa ka bit ka biang jong ki nongïashim bynta bad ki nongïalehkai bad hato la shimkhia neem halor ki jingbam ba la ai ïa ki? Mano ki ophisar, shakri sorkar, kontraktor kiba shim jingkitkhlieh na ka bynta ka jingpynïaid ïa ka jingïalehkai? Ïano ka Sorkar ka thung ban peit na ka bynta ka bam ka dih jong ki nongïalehkai bad ki nongïashim bynta?”la buh jingkylli ka HITO.
“Ngi dawa ban thung da ka jingtohkit halor ka tnat ba dei peit, ïa ki bor pynïaid bad ïa ki riewshimet kiba hap shim jingkitkhlieh na ka bynta ka jingbym biang bad ka jingphiel bad ban pynshitom ïa ki pyrshah katkum ki kyndon jong ka aiñ,” la ong shuh shuh ka dorkhas ba la soi da u President Bah Donbok Dkhar bad u General Secretary u Bah Wanbun N Dkhar.
Lah ban kdew hangne ba hynnin ka sngi, ki samla nongïalehkai ki la ïathuh ba ki la shah pynshah thngan baroh shisngi ha ka por ba ka President jong ka ri India, ka Draoupadi Murmu ka wan plie ïa ka Meghalaya Games 2024 ha Tura.
Ki samla ki la ïathuh ba hadien ba ki la shah thngan baroh shisngi, ynda la ioh bam pat ki ïoh da ki jingbam dap lyer, kum ki samosa barit, ki chips, ki nuts bad ka umsoh.
Ki video ki la saphriang ha ki social media ba kiba bun ki nongialehkai ki la hap ban ïaid da ka kjat sha ki jaka kiba kham jngai jaka sah. La saphriang ruh ki video ba wat ia ki pliang bam jar uh la pyndonkam ban sait da ki brut kiba ju pyndonkam ha kaba sait paiñkhana.
Hynrei na ka liang u Myntri ka tnad Sports, u Bah Shakliar Warjri, u la pynshai ba kaei kaba jia hynnin ka lah sngi u Blei, ka jingeh baroh ka mih dei namar ka jingwan ka President ha kaba la pyrkhing ïa ka leit ka wan ha surok bad ka jingkhang ruh ïa ki surok ban ïaid. Tangba u la ïathuh ba hynnin hi ka miet la pynlong ïa ka jingialang ban ïakren ïa kine ki jingeh bad kular ba kiba kum kine kin nym jia shuh nangne shakhmat.
