Shillong, Kyllalyngkot, 16: Ka Dorbar Shnong Ryngud Hima Syiemship Sohra ka la pynlong ïa ka Tamasa Tharia Wah ha ka Wahrew ne ka Beach Festival ha ka 13 tarik mynta u bnai.
Ïa kane ka tamasa tlang ba la tip kum ka “Tharia Wah Rew” la plie da u Myntri ka Sorkar Jylla u Bah A L.Hek ryngkat jingïadonlang jong u Bah Khrawboklang Basaïawmoit, State Vice-president ka BJP, ka Dr.Fenela L.Nonglait, u Syiem ka Hima Sohra u Paiem Freeman Syiem, u Sordar Shnong Bah Edmund Khongsya bad ki nongkitkam ka Umrew Beach Festival.
Ka Tamasa Tharia Wah Rew, harud Wah ka dei ka sien kaba nyngkong ïa ka shnong Ryngud ban pynlong kum shi bynta ban pynkut ïa ka jingdap 50 jong ka shnong.
Katkum ka jingïathuh jong Sordar Shnong Ryngud u Bah Edmund Khongsya ka shnong kum ka jingpynkhreh ban pynkut ïa ka jubili jong ka shnong ka la shim ka rai ban pynlong ïa ka tamasa Beach Festival ïa kaba la shim bynta da ki nongshong shnong kum ka jingïakop jngi, ka jingïalehkai Volleyball, ka Ïasiat Khnam bad kiwei kiwei.
Ha jingpynlong ïa ka tamasa Tharia Wah ha Wah Rew ka dei ka jingpynkynmaw ïa ka iew ïadie ïathied ka shnong Ryngud Hima Sohra ïa ki mar rep bad ki soh ki pai kum u Soh Pieng uba jur bha ban ïadie ha katei ka Wah Rew namarba ki nong Bangladeh ki ju wan da ka lieng ban kit sha Bangladesh na Riwar Sohra namarkata kane ka jaka ïadie ïathied ka Hat la ju tip kum ka “Hat Sohpieng” ïathuh u Bah Khongsya.
Ka shnong Ryngud ryngkat bad ki nongshong shnong jong ka shnong Ryngud kawei na ki shnong kaba dang hap ha ka thaiñ Sohra ka dei ka jaka kaba jur ban pynmih ïa u kwai bad u tympew bad ki long ruh ki mar rep kiba kongsan bha bad ki dei ruh ki markhaii kiba long u budlum jong ka ïoh ka kot ïa kane ka shnong namar ha ki por mynshuwa kane ka don ïa ka hat ïadie ïathied bad ka ri Bangladesh naduh shwa ka jingïoh laitluid ka ri India haduh ban da ïoh ka jylla la kajong ha u snem 1972.
Haduh mynta mynne kane ka shnong ka im beit da ki kam rep ban khaii ïa ki soh ki pai bad u kwai u tympew kumjuh u sohmrit bad u sla tyrpad.
Ka shnong Ryngud ha ki por mynshuwa ki wahheh ki la kyrhuh bad ki wahduid ruh ki shlei lut kat haduh ba la mih ruh wat ki umpohliew ha manla ki jaka. Kumjuh ki nongshong shnong ki pahuh pahai mynta kam long shuh naduh ba la khang dam ïa ka iew ka hat Ryngud kaba don ha Wah Rew hadien ba la don ka thma India bad Pakistan ha u 1972 ka iew Khaii Khabar ka la jah noh.
Ka jingduh noh jong ka hat Sohpieng, Ryngud ha WahRew namar ha kitei ki snem ka Bangladesh ka hap ha ka jingsynshar jong ka Ri Pakistan ka la don ka thma ban knieh ïa ka Bangladesh ban don bad ka Ri Pakistan da ka jingïarap jong ka Indira Gandhi ka Myntri Rangbahduh ka Ri India ka la dakhol ïa ka Pakistan ban ai jingïada ïa ka Bangladesh.
Ha ka jingshisha ka tamasa Tharia Wah Rew ka la don teng ha ki 1984 ba la ju leh da ka Hima Sohra bad ka Shnong Ryngud ban pynim ban pynkynmaw ïa ka jingïadei ïa ka hat Sohpieng hynrei ka shu jah da ki phew snem ïathuh u Sordar shnong Ryngud.
