Pyrshah ka Congress ba pynkylla kyrteng ïa ka MGNREGA, naduh 10 tarik yn khih pyrshah

Shillong, K’Lyngkot 08 : Ka Congress ha Meghalaya ka la rai ban ieng pyrshah naduh ka 10tarik mynta u bnai tad haduh ka 25tarik jong u Rymphang halor ka rai jong ka sorkar pdeng ban pynkylla kryteng noh ïa ka skim 100 sngi ba ju tip kum ka Mahatma Gandhi National Rural Employment Guarantee Act (MGNREGA) sha ka Viksit Bharat-Guarantee for Rozgar and Ajeevika Mission (Gramin) (VB-G?RAM?G) Act,?2025.
“Ngi la pynkhreh ban pynlong da ki jingpyrshah kiba bun jait halor kane. Ki la pynduh noh ïa ka MGNREGA bad kin sa pyntreikam ïa ka skhim VB-G RAM G,” ong u nongïalam ka Congress Bah Vincent H Pala haba kren bad ki lad pathai khubor ha kane ka sngi Palei.
U Bah Pala u la kynnoh ba katei ka skhim thymmai ka dei kaba la thmu ban shim noh ïa ka hok jong ki ba duk bad ka dei ka rukom treikam kaba ïapher na ka MGNREGA.
“Ka jingkylli jong ka jingsngewtikna ha ka Bill kaba thymmai kam mih satia. Kum ka nuksa, mynshuwa ha ka MGNREGA lada phi kwah ïa ka kam phi pan na ki bor ba dei peit bad ki hap ban ai ïa phi hapoh 15 sngi bad lada kim ai ki hap ban siew hynrei ha ka Bill kaba thymmai, lada phi kwah ïa ka kam, kin phah ïa ka sha ka sorkar pdeng bad ka shong ha ka sorkar ban mang pisa bad kin rai la kin ai neem,” u la ïathuh.
Utei u nongïalam Congress u la kynnoh ba ka sorkar BJP ka pynjngut noh ïa ka jingpyntreikam ïa ki skhim, kynthup ïa ka MGNREGA, bad ka pyndonkam ïa ki kor ki bor ki bym lah ban shaniah kum ki kor ki bor kiba pynshong nongrim ha u Aadhaar bad ki geo-tagged system.
Katkum ka jingong jong u, kane ka jingkhih pyrshah kan long kylleng kylelng ki bynta jong ka jylla.