Shillong, Risaw : U MLA ka Mawlai u Bah PT Sawkmie ha ka sngi Saitjaiñ ba la lah u la pynurlong ïa la ka jingkular kaba u la khlei ha u rangbah shnong barim u (L) Bah Silvester Kurbah, ba ju khot ieit bah Best ia kaba u la noh synñiang 4 lak tyngka ryngkat ki tiar shet tiar tiew sha ka dorbar shnong Mawlai Phudmuri ba la ai ha Indoor Sports Hall, Mawlai Phudmuri.
Haba ai jingkren shuwa ban ai ïa ka work order bad ïa ki tiar shet tiar tiew u Bah PT Sawkmie u la pyrto ia ki kam u acting rangbah shnong bah S. Khongkliam halor ka jingtrei shitom jong u, kumjuh ruh ia u secretary shnong uba la pynneh ïa ka jinglong khuid jong u ha ki kam shnong kam thaw bad ba u long ruh u briew ba sngewrit.
U pynpaw ba u ai ïa kane ka work order kaba 4 lak tyngka na ka bynta phra tylli ki dong kiba don hapoh shnong Phudmuri, kaba long mar 50,000 tyngka na ka bynta kawei ka dong. Kumjuh ruh ïa ki tiar shet tiar tiew sha 8 tylli ki dong, ba ïoh mar ar tylli ki top syntek kawei ka dong, ba long 16 tylli ryngkat ki tyrpar, ki khiew, ki ketli bad kiwei kiwei.
U bah PT Sawkmie u pynpaw ruh ïa ka jingsngew bynñiaw ba ki kam pynroi kum haba tap slep ïa ki nala heh, kiba lah ban ïaid kali, kiba don ha Mawlai Phudmuri, Nongpdeng, Nonglum bad ia ka surok ha Mawlai Umjaiur, ka project kaba da ki klur tam, la shah pynsuki ha kibym kwah ban ïoh burom ma u, lada dep shna ïa kine.
U pynkynmaw ruh ba u la pyrshang ha i bor barit ban ïarap kat kaba lah ïa ki shnong bad ïa kiba donkam jingïarap ha ka por jong ka khlam kaba la pynsohsat ïa ki paidbah ha ki ar snem ba la leit.U la pynpaw ruh ba um ithuh ïa ki paidbah tang haba la jan ka ilekshon, hynrei naduh ka sngi ba mar ïa jop u sngewthuh bad sngewkhia ïa ki jingeh jong ki.
U la pynpaw ruh ka jingsngewkhia halor ka Long Round road ne ka surok na Mawlai Petrol Pump ter ter shaduh Mawlai Mawroh, kaba la sniew shaba palat bad kaba la pynjah burom na ka jingtih ban siang pipe bad sa ïa wad hi ma phi ki paidbah mano ba pyntrei ïa ka, ong u bah PT Sawkmie.
Ha kane ka sngi la ïa don lang ruh u acting rangbah shnong bah S. Khongkliam, uba la ai khublei bad pynpaw ïa ka jingsngew nguh ïa u MLA haba ïa dei bad kine ki jingai jingïarap ha ka jingdon ryngkat lang ka Excutive Committee jong ka shnong, ki longkmie bad kiwei kiwei.
Haba kren ai khublei u general secretary ka shnong Mawlai Phudmuri u bah Lamphrang Nengnong u la pynpaw ba u bah PT Sawkmie u dei u Real Politician ym u Business man, “Nga nud ban ong ïa kane shaphi ki paidbah, namarba u long shisha kumta,” ong u secretary shnong.
Nalor kata ula pynpaw ruh ka jingsngewkmen ba u MLA u la pynurlong ïa kaei kaba u la kular naduh ka por u bah Silvester Kurbah bad u la pynurlong ïa ki ha katei ka sngi.
Hashuwa kane la ïoh ruh ïa ka jingkren u bah Franky Massar, uwei na ki nongkyrshan baradbah jong u Bah PT Sawkmie, uba la pynkynmaw ïa ki kam ba u MLA u la leh na ka bynta ka Mawlai Konstitwensi.
U la ïathuh ba u bah PT Sawkmie um dei u nongmihkhmat ba ai skhim tangba la jan ilekshon, naduh ka sngi nyngkong mar ïa jop u la sdang ban trei ïa ka kam jong u, u la maramot pynbha ïa ka surok basniew bha shuwa ban poi ha FCI, kaba ki kali ki ju ïaid halor ki pipe um, hynrei mynta ka la bha, ha NEHU kaba ju shlei um, u la shimkhia bad la pynbha ïa kane ka surok ruh bad mynta kam shlei um shuh.
U pynkynmaw ruh ba ïa ka surok Mawlai By-pass u bah PT Sawkmie u la shimkhia ban buddien bha ïa ka ruh bad kren shaphang kane ka surok wat haïing dorbar kaba la ïoh ban plie pat. Wat ïa ka jingkieng Wahumkhrah dei hi u bah PT Sawkmie uba la buddien thikna bad kaba la urlong mynta.
U pyrto ïa u MLA ba u ai jingïarap ha ka por ka khlam, khlem da peit shilliang khmat ïano ïano ruh, u MLA u pyntreikam hok ïa ka skhim kum u nongmihkhmat ka thaiñ.
