Shillong, Naitung 05: U Myntri ka tnat Pule Puthi ka sorkar jylla u Rakkam A Sangma u la leit ban jurip ïa ka Shillong Government College of Engineering (SGCE) bad ïa ka Shillong Polytechnic, da kaba pynskhem bad pynthikna ba ka SGCE kan sa sdang noh ïa ka snem pule kaba nyngkong ha une u snem.
Haba kren sha ki lad pathai khubor hadien ka jingleit jurip u Sangma u la ong, “Mynta ka sngi ngi leit jurip ïa ka Shillong College of Engineering bad kumjuh ruh ïa ka Polytechnic, ha ryngkat bad ki heh ophisar, principal, bad ki nongtrei. Nga kwah ban kynduh ïa ki shimet naba kane kadei ka snem ba nyngkong ka engineering college ka ban sdang ruh ïa ka jingpule.”
U Myntri u la pyntip ba ïa ki class la khmih lynti ban sdang ha u Nailar bad ïa ka kam pynrung klas ka la dep ban sdang. “Ka sorkar pdeng ka la mynjur ïa ka jingtyrwa ba la phah sha ka All India Council for Technical Education (AICTE) na ka bynta ki 30 seat kawei kawei ha ki artylli ki course – Civil Engineering and Electrical Engineering,” u la ong.
Haba kylli halor ki jinglong ba la khreh halor ki kam jingtei, u Sangma u la pynthikna, “Ngi la long kiba la khreh bad ngi dang ap ïa ka jingai jingbit kaba khatduh na ka AICTE, bad ngi la jan ba ban sdang ïa kane ka kam.”
Haba ïadei bad ki nongtrei, u la ong, “Katto katne ki nongtrei ki la don. Principal-in-charge dei hi na Shillong Polytechnic, bad ngi don ki briew kiba tbit ha ka kam. Ka jingthung kam yn leh katkum ka jingdonkam.”
Lah ban kdew ba dang shen ka SGCE ka la ïoh ka jingmynjur ka AICTE na ka bynta ka undergraduate jong ka ha ka Civil and Electrical Engineering course.
