Nongstoiñ, Risaw, 23: U Francis Pondit R.Sangma MLA barim ka Mawshynrut u la pynthikna ba un ïaleh elekshon MLA na ka party BJP ha u snem ban wan. Kum ban pynkynmaw ba kham mynshuwa u Francis Pondit R Sangma, u la don ka jingthmu ban pan tiket na ka All India TrinaMool Congress ba la ïalam da u Dr.Mukul Sangma, hynrei ym tip na kaei ka daw um shym la aplai tiket shuh na katei ka party.
Hadien kata u la pyrshang ban ïakynduh sa ïa ki nongïalam jong ka West Khasi Hills Blcok Congress Committee ban ïa sngew-thuh jingmut na ka bynta ba un aplai tiket, hynrei na ka ling jong ki Nongïalam ka District Congress Committee kim pdiang ïa ka jingtyrwa jong u.
Utei u MLA barim ka Mawshynrut hadien ba u la shah kyntait na kitei ki party naduh u bnai Jylliew, kumta u la sdang shait shait ban leit sha ki paitbah nong-kyrshan ban ïa phylliew jingmut kumno un leh, ha kaba ki paitbah ki la ai jingmut ïa u ba un pynrung kyrteng noh sha ka Bharatya Jnata Party lada u don jingmut ban ïaleh election.
Haba pyrshang ïakren bniah bha ha kaba ïadei bad ka rai jong u, u bah Sangma u la pynthikna bad u da ong ruh, “Nga kum u rangbah u ba la long teng u Nongmihkhmat, nga la lap ba kane ka sorkar NPP kaba la ïalam da u Conrad Kongal Sangma, ka dei ka sorkar kaba bam duh ïa ka ïoh ka kot jong ki paitbah bad ka dei ruh ka sorkar kaba sarong kyreit da kaba kam trai lut ïa ki skhim bad ki kam pynroi kiba la dep leh da ka sorkar ba rim”.
“Kum u nongmihkhmat barim nga isynei haduh katta katta ïa ki paitbah, namar ki shah shet shukor ha kiba bun ki liang, kum ka jingpynsangeh ban pynmih ïa ka resol thung kam pulit, ka jinglehbeiñ ïa ki nonghikai, ka jingthok jong u Conrad Sangma ïa ki paitbah ha Shallang ha shuwa ka elekshon 2018 ba un pyllait noh ïa ka jingtih bad shalan dewïong hapoh hynriew bnai, hynrei haduh mynta ym pat lah ban pyllait luid kumba ju long”, ong u Bah Sangma bad bynrap, “Halor kitei ki nongrim ba kum u rangbah u ba la shah jied teng kum u nong-mikhmat, nga hap ban rung sha ka BJP na ka bynta ban ïasaid na ka bynta ki jingeh jong u paitbah hapoh ka constituency”.
Katba na ka liang u babu Spastarlin Nongrem na Nongstoiñ u rangbah uba la ïaid shaid shaid haman la ki shnong ban leit ïakynduh ïa ki paitbah Rambrai, ban pan jingkyrshan na ka bynta ka election ban wan, wat la um pat tip la ka party kan ai tiket ne em ïa u ba un ïaleh na katei ka constituency ha u snem ban wan, hynrei haba ïakren bad u nongthoh khubor u la ong ba namar ba u ïohi ba ki paitbah ki mad shibun ki jingeh ha baroh ki liang, um banse ban wad ki lad ki lynti kumno ban ïarap ïa ki.
U la ong ruh, “Nga la ïohlad ban leit sha Delhi bad ïakynduh markhmat bad u Narendra Modi Myntri Rangbah duh ka ri, ha kaba u la pynsngew ha u ïa ki jingdon kam kiba bun na ka bynta ban kyntiew ïa ka ïoh ka kot, ka kamai kajih, ka rep ka riang, ka jingpynïoh kam ïoh jam ïa ki samla bad kiwei kiwei, ha kaba u Myntri Rangbah duh u la pdiang da kaba sngewbha. Kumta nga kyrmen ba ki nongïalam ba ha khlieh duh jong ka party hapoh ka jylla kin bynshet ha nga kum u kyrtong ban ïakhun ïa ka elekshon ha u snem ban wan.”
