Shilllong, Nohprah 19: KaVoice of the People Party (VPP) ka la pynpaw ka jingbym sngew ïahap bad ka jingpyrshah ïa ka jingpynbna da ka sorkar Meghalaya dang shen ban pyntreikam noh da ka Syllabus ne da ki kot jong ka NCERT ha ki skul bad kaban sdang noh naduh une u snem ban wan.
Ha ka kyrwoh ba la pyllait da u Dkhot ka Media Cell jong ka Seng, u Dr. Rusievan Shangpliang, ka Seng ka ong ba ka pynpaws ka jingïaroh ïa ka jingthmu jong ka sorkar ban ban pynbha ïa ki kot pule ha ki skul, hynrei ka Seng ka ngeit ba ka jingpynbna bad ka jingpynkylla kaba kynsan kynsan khlem da don ka jingïatai ne ka jingïasyllok bad kito kiba don bynta ha kane ka kam, khamtam eh ki nonghikai kadei ka jingthmu ka bym biang satia.
Kan long kaba bha shibun ïa ka sorkar ha shuwa ban pyntreikam ïa kane ka donkam ka jingïatai ka jingïasyllok bad kito kiba ïa don bynta ne ki stake holder, khnang ba ka jingpyntreikam ka long kaba ïaid beit khlem jingthut ne ktah ïano ïano.
Ka Seng ka ong ruh ba u Myntri Rangbah u la kular ba ki kot ka NCERT kan peit ruh ban pynrung ïa kiei kiei kiab donkam na ka jylla, hynrei kane ka paw ba kan don ka jingeh la ka lah ne em ban long. Ka jingpynrung ïa kiba donkam na ka jylla lait na ki kot Science bad Mathematics ka donkam ka jingngam jylliew bha hapdeng ka State Council of Educational Research and Training bad ka NCERT. “Ban leh ïa kane tang ha i por iba lyngkot ka long ka bym lah ban long, hynrei donkam ka jingtrei kaba sani bha”, la ong u Dr. Shangpliang.
Shuh shuh ka Seng ka ong ba ka sorkar MDA la tip kum ka sorkar kaba ïaleh dohïap ban pyntreikam ïa ka NEP 2020, hynrei ka la ïaid lait pat ia ka 4.31 bad 4.32 jong ka National Education Policy (NEP) 2020 ha kaba ïadei bad ka jingpyntreikam ïa ki kot NCERT.
Ka Seng ka pynpaw ruh ka jingsngewkhia ïa ka jingthmu borabor jong ka BJP ban pyntreikam ne ban mushlia ha kaba ïadei bad ka pule puthi.
Kumta ka Seng ka kyntu ïa ka sorkar ban pynsuki ïa kane ka kam bad ban pynlong ka jingïatai, ka jingïaphylliew jingmut shuwa kaba jylliew, khnang ban lah shisha ban pynbha ïa ka pule puthi ha ka jylla.
