Shillong, Nohprah, 19: Ka Mawphlang PHE Workers’ Union (MPWU), kaba long ka shatri jong ki nongtrei casual bad work charge staff kiba trei hapoh ka tnat PHE jong ka Mawphlang Division ha ka sngi Baar ki la kyrpad ïa ka Sorkar ba kan pyllait noh ïa ka tulop kaba sahteng naduh u bnai Risaw, Naiwieng bad kumjuh ruh na ka bynta u bnai Nohphrah mynta u snem 2023.
U President jong ka Union u Bah Napoleon Mawphniang ha ka jingïakren bad ki lad pathai khubor u la ïathuh ba ka Union ka ladep phah da ka jingthoh sha u Myntri jong ka tnat PHE u Marcuise N. Marak bad sha ki bor bahalor jong kane ka tnat ba kin wad ïa ki lad ki lynti na ka bynta ban siew noh ïa ka tulop jong ki nongtrei Casual kiba la shakri la 10 snem, 20 snem bad 30 snem kynthih.
“Ha ka 22 tarik, Naiwieng, ngi la phah ïa ka shithi sha ki Executive Engineer jong ki ar tylli ki Division jong ka Mawphlang Division bad ha ka 24 tarik Naiwieng, ngi la phah shithi ruh sha u Myntri ka tnat PHE, sha u Deputy Secretary ka tnat PHE bad sha u Commissioner & Secretary ka tnat PHE bad sha u Deputy Commissioner Labour jong ka District Labour Officer ka East Khasi Hills,” u la ong.
Hadien kane ka jingphah jingthoh, u la ïathuh, ba ka tnat PHE ka la pyllait ïa ka tulop kaba tang shi bnai sha ki nongtrei Casual, kata, na ka bynta u bnai Nailur.
“Ngi kyrpad ïa ki bor bahalor ba kin pyllait noh ïa ka tulop jong u bnai Risaw, Naiwieng bad kumjuh ruh ïa ka tulop jong u bnai Nohprah. Ngim banse ban mih shakhmat namarba ki nongtrei Casual ki dei kiba shu trei mynsngi bad bam da miet namarba ka jingïoh jong ki ka long kaba rit bad ka jinglut pat kaba heh,” la ong u Bah Mawphniang.
Ka Union ka la kyrpad ruh ïa ka tnat PHE ba kan pyllait noh ïa ka pisa na ka Variable Dearness Allowance (VDA) na ka bynta ki nongtrei Casual ka tnat PHE.
U la ïathuh ruh ba kane ka jingeh jong ki nongtrei Casual bad Work Charge kam long satia tang ha ka tnat PHE Mawphlang Division hynrei ha ka tnat PHE ha ka jylla hi baroh kawei.
Tang ha Mawphlang Division ki nongtrei Casual bad Work Charge ki don kumba shih ajar ngut, la pyntip u Bah Mawphniang.
Katkum ka jingïathuh jong u Bah Mawphniang, ki bor bahalor jong ka tnat PHE ki la kular ban pyllait ïa ka pisa shwa ka Khristmas hynrei haduh mynta ki nongtrei Casual kim pat ïoh satia wat ïa ka tulop jong u bnai Risaw bad Naiwieng.
Ha kaba ïadei bad ka jingdon jong ki nongtrei Casual, Work Charge Staff, Muster Roll bad kumjuh ruh halor ka rukom siew bainong, ka Union ka la pyntip ba kan sa pan jingtip da ka RTI na ka tnat PHE jong ka Sorkar Jylla.
