Ïashim bynta ki spah ngut ki khynnah ha ka Christmas Carol ba pynlong da ka JCES Mawkhar

Shillong, Nohprah 19 : Ka Junior Christian Endeavour Society Mawkhar (JCES), jong ka Balang Presbyterian Mawkhar mynta ka 19 tarik Nohprah 2023 ka la ïoh ban pynlong ïa ka jingïaid Christmas Carol hashuwa ban poi ka 25 tarik Nohprah kaba dei ka sngi ba U khunlung Jisu Un wan longbriew sha kane ka sla pyrthei.
Ïa kane ka jingïaid Carol ba la sdang na ïing Mane Balang Presbyterian Mawkhar, la wan ban ïashim bynta shitrhem da ki spah ngut ki heprit ba la wan ban synran lang da ki kmie ki kpa, nangta ki samla shynrang bad kynthei, ki Rangbah Balang bad ki longkmie longkpa.
La sdang ïa ka jingïaid Carol na phyllaw ka ïing mane, sha Motphran, Umsohsun, bad la wanphai biang sha ïing mane da kaba ïaid na ka surok bah Mawkhar.
Haba ïakren bad ka Kong Emika M Syngai, General Secretary jong ka Junior Christian Endeavour Society Mawkhar, ka la ïathuh ba manla u snem la ju pynlong ïa kane ka jingïaid Carol bad mynta u snem ki don haduh 500 tam kiba la wan ban ïashim bynta.
Ka la ïathuh ruh ba manla u snem ki ju pynlong ïa ka jingïaid Carol ban pynbna ïa ka jingwan longbriew u Jisu Khrist sha kane ka sla pyrthei bad khamtam eh sha kito kibym pat ngeit ban pynbna ba U Blei U long Bakhraw.
Kum ban kdew hangne ba ha ka 25 tarik Nohprah manla u snem la ju rakhe bad kynmaw ïa ka jingwan longbriew U Jisu Khrist sha kane ka sla pyrthei lyngba ka Mary Theisotti bad u Joseph ïa kaba la lap nyngkong da ki Nongap Langbrot ba la kha ïa u Jisu ha Bethlehem bad ba la pynthiah hapoh ka Shyngoid ha sem kulai.