Pynstet ki lad jingïarap sha kiba shah lyngshop mariang, bthah u CM ïa ki bor distrik

Shillong, Ïaiong 01 : U Myntri Rangbah ka Jylla, Conrad K Sangma ha ka sngi Nyngkong u la ïathuh ba u la dep bthah ïa ki Deputy Commissioner ba kin pynstet ïa ki lad ai jingïarap sha ki lanot ba ngat ha ki jingshah lyngshop mariang la kumno kumno hapoh 24-48 kynta.
Kane ka jingbthah ka la mih hadien ka jingwan lyngshop kynsan ki bor ka mariang ha kylleng ki bynta jong ka jylla ha kane ka sngi U Blei.
Haba kren bad ki lad pathai khubor, u Myntri Rangbah u la ïathuh ruh ba u Chief Secretary u la dep ruh ban buddien halor kane ka jingshah lyngshop mariang.
“Ngi la kyntu ba ha ki 24-48 kynta, kaba ngi khmih lynti ba ki DC kin lah ban pyndep ïa kine ki lad ai jingïarap sha ki longiing kiba kynduh ïa kine ki jingjia ba shah ktah ha ki bor ka mariang,” u la ong.
Nalorkata, u Myntri Rangbah u la pyntip ruh ba ka sorkar jylla ka la dep ruh ban mynjur ïa ka polisi ban aibor ha kito kiba dei peit na ka bynta ban ai ïa ki lad jingïarap ba kyrkieh sha ki lanot naduh u snem ba la dep.
“Kumta, mynta ki DC kim donkam shuh ban da ïoh jingbit na ka sorkar jylla na ka bynta kino kino ki lad ai jingïarap hynrei ki lah ban shim hi ka rai ha ka bor jong ki ban pynpoi ïa ki lad ai jingïarap kynthup wat ban sam ïa ki tiar ban shna iing kum ki tin sopiing. Ïa kane ka rai laitluid la dep ban ai ha ki Deputy Commissioner,” u la ong.
Lah ban kdew hangne ba ha ka sngi U Blei, ka lyer kaba jur ryngkat u slap ka la pynjulor ïa bun bha ki iing ha Meghalaya kaba la antad kumba 200 tylli ki longiing ki la duh noh ïa ki iing ki sem jong ki.
Ha kane ka jingjia, don ruh kiba la mynsaw bad bun ki jaka kiba la shong khlem bording na ka daw ka jingkhyllem ki dieng ha kiba bun ki jaka. Kane ka eriong ka la pynjot ruh wat ia ki jingthung jingtep ha kiba bun tylli ki shnong.
Lada shu khein kyllum tang na kiba ïoh jingtip, la kumno kumno ki iing kiba shah pynjulor ha kane ka jingwan syllad ka eriong ki la kot sha kumba 150 tylli ei ei ne kumba hapoh 200 tylli.
Tang ha Ri Bhoi District, da ki phew tylli ki longiing ki la julor ha ki thain khappud jong ka Block – II ha ka jingwan syllad ka eriong ha ka sngi U Blei ha ka por 4baje ei ei.
Haba phai sha ka jingjia ha ka thaiñ Block II bad hap ha ka Raid Nongtung ha Ri Bhoi, ki lai tylli ki Shnong ki la shah kthah bha ba kynthup ïa ka Shnong Ummat I, Ummat II bad ka Shnong Nongsder ha kaba 28 tylli ki ïing ki la shah pynjulor ha ka erïong erngit ha kitei ki 3 Shnong.
Kane ka eriong ka la leit ruh ban syllad ïa ki iing ki sem ha ka thain Jirang nalor kiwei kiwei ki shnong kiba don ha ka thain Ri Bhoi. Halor kane ka jingjia ba sngewsih bun ruh ki longïing ki la kylla khlem ïing khlem sem ha kaba katei ka erïong bajur ka la wan ban punjulor ïa ki ïing ki sem bad baroh ki jingdon jingem jong ki hapoh ki ïing ki sem.
La ong ruh ba kane ka eriong ym tang ba ka punjulor ïa ki ïing ki sem, hynrei bun ki jingthung jingtep ruh ki la julor ba la don ruh ka jingïap phria ha ka thaiñ Ri Bhoi.
Ha South West Khasi Hills pat la ïoh jingtip ba ka jingshah pynjulor ki iing ki sem ka la kot sha ki 68 tylli bad ki don pat kumba 39 tylli kiba shah pynjulor malu mala. Kine ki jaka ba syllad ka eriong ki kynthup ha ki thain jong ka Warsan Lyngdoh, Mawjaraiñ, Nongrim Mawpat, Pyndenumjaraiñ, Umsaw, Nongtynñiaw, New Mawjai, Nongpuiñskei, Mawnore, Mawhiangrnga, Mawkhlaitngap, Mawpat, Rangmaw, Mawsaw, Manad, Phlangdiloiñ, Wahkaji.
Kane ka eriong ka la pynjulor jur ruh ïa ka skul Vesto Upper Primary School kaba don ha shnong Rangjadong ka la shah lied noh ki tin sop bad la don ki ïing briew bad ki dukan kiba la shah pynjulor malu mala.
Ha West Khasi Hills ruh kumjuh ki la don da ki phew tylli ki shnong kiba la ngat lang ha katei ka apot ha ka miet 31tarik u Lber ha ka thain Ri Muliang kum ha Langpih, Tynghor, Umyiap bad kiwei kiwei ki shnong ba marjan.