Shillong, Nohprah 5 : Ka Pension Fund Regulatory and Development Authority (PFRDA) ryngkat bad ka State Bank of India’s Local Board Committee (SLBC), Meghalaya, ki la pynlong ïa ka Atal Pension Yojana (APY) Outreach Program ban kyntiew ka jingsngewthuh shaphang ka skhim APY ha nongbah Shillong mynta ka sngi.
Ha kane ka prokram la ïadonlang ki kynrem ki lyndan ba kynthup ïa u Deepak Mohanty, Chairman jong ka PFRDA, u Pravesh Kumar, Chief General Manager jong ka PFRDA, bad ka Priyanka Gupta, DGM PFRDA. U Dr. Shakil P Ahammed, Additional Chief Secretary sha ka sorkar Meghalaya, u la plie ïa ka jingïalang kum u Kongsan, u NG Yirmayai, Director jong ka North Eastern Council, u la long u symbud kongsan. Ki ophisar jong ka Reserve Bank of India (RBI), State Bank of India (SBI), bad Sorkar Meghalaya ruh ki la ïadonlang ha kane ka jingïalang.
U Dr. Shakil P Ahammed, Additional Chief Secretary sha ka Sorkar Meghalaya, ha ka jingai jingkren, u la kyntu ïa ki nongtrei bank ban peit ïa ka skhim APY kam dei tang ka kam pisa, da kaba ban jur ïa ka bynta jong ka kum ka atiar na ka bynta ka jingshngaiñ ha ka imlang sahlang. “Ka dei ka skhim na ka bynta ki briew ki bym ïoh lad ban trei ha ka kam ha kaba ïa ka bai bam tymmen la siew da u nongai kam hynrei na ka bynta ki briew kiba trei ha ki kam bym pynbiang ïa ka bai bam tymmen bad kiba hap ban shaniah ïa ka rukom kynshew pisa dalade ban bteng ka jingïoh pisa hadien ba la shongthait na ka kam,” u la ong.
U Deepak Mohanty, Chairman jong ka PFRDA u la batai shaphang ki bynta jong ka skhim, ba kynthup ka jingpynthikna jong ka Sorkar India ban pyndap ïa kano kano ka jingduna ha ka corpus jong ka bai bam tymmen, da kaba pynthikna ba ki nongthep pisa ki ïoh ïa ka bai bam tymmen ba la kular. U la kyntu ïa ki bank ban sngewthuh shaphang ka skhim bad ban ai jingtip ïa ki jingmyntoi jong ka skhim sha ki paidbah khnang ba kin lah ban ïoh ïa ki jingmyntoi jong ka skhim.
U Pravesh Kumar, CGM PFRDA u la batai shaphang ki jingmyntoi ban ïasoh kham kloi bad ka APY, da kaba ban jur ïa ka jingkongsan ka jingkiew ka pisa ba lang. U la kyntu ruh ïa ki bank ban pyndonkam ïa ki atiar kheiñ jingkheiñ jong ka PFRDA ha ki prokram ai jingtip. jong ki. Ka Kong N. Tariang, Director of Institutional Finance, Sorkar Meghalaya, ka la kren shaphang ka jingkongsan ka jingkyntiew jingtip naduh na trai, khamtam ha ki jaka nongkyndong. Ka la kren shaphang ka jingdonkam ïa ka kamai kajih kaba thikna, kum ka bai bam tymmen, ïa baroh, kynthup ki nongbylla, ki nongrep, bad ki trai jong ki kam khaïi pateng barit baria ha ki shnong.
Arngut ki briew kiba la ïasoh bad ka APY ba thymmai ki la ïasam ïa ki jingsngew jong ki shimet, da kaba batai kumno ki la pynrung kyrteng ha kane ka skhim ban ïoh ïa ka kamai kajih kaba skhem na ka bynta ki snem shongthait jong ki bad kiar ban long ka jingbankhia ïa kiba haïing jong ki. Ka Priyanka Gupta, DGM PFRDA ka la ai jingpynshai shaphang ka skhim APY, da kaba peit bniah ïa ka jingtreikam jong ka ha ki jylla bapher bapher bad ki bank. Ka la pynshlur ïa ki nongïashim bynta ban pyndep ïa ki thong jong ki na ka bynta u snem mang tyngka ba mynta, da kaba ban jur ïa ka jingdonkam ban bteng ki prokram ai jingtip ban pynthikna ka jingbun kiba pynrung kyrteng.
Hadien kane ka la don ka jingïalang kylli jingkylli bad jubab, ha kaba ki nongïashim bynta ki la kylli jingkylli, kaba pyni ïa ka jingkwah tip jong ki shaphang ka skhim bad ki jingmyntoi jong ka. Ka prokram ka la kut da ka jingïalang sam khusnam ban ithuh ïa ki jingtreikam ba tbit ha ki thup bapher bapher. Ki khusnam ba la ai ki kynthup ïa ka APY Citizens Choice Campaign awards na ka bynta ka snem mang tyngka 2023-24, ka Certificate of Achievement for 100% Target Achievement ha ka snem mang tyngka 2023-24 na ka bynta ki State Coordinator, bad ka Certificate of Achievement for 100% Target Achievement ha ka snem mang tyngka 2023-24 na ka bynta ki Local District Managers (LDMs).
