Pynsngew ka SWS-EJH ha ka MePDCL ïa ka jingkiew palat ka bai thang bording ha East Jaiñtia Hills District

Khliehriat, Nailar, 09: Ka Synjuk ki Waheh Shnong East Jaiñtia Hills District, ha ka sngi Baar ki la leit ban buh da ka jingthoh hakhmat u Executive Engineer jong ka Meghalaya Energy Power Distribution Corporation Limited (MePDCL), East Jaiñtia Hills District ban pynpaw ïa ka jingsngewkhia halor ka jingbym biang bha ka rukom sam bording bad ka jingkiew palat ka bai thang bording jong ki paidbah hapoh ka district.
Katkum ka jingthoh ba la soi da u President jong ka Synjuk ki Waheh Shnong East Jaiñtia Hills District, u bah Hambertus Nongtdu bad u General Secretary, u bah Jespar Bareh, ka synjuk ka la pynpaw shuh shuh ba ka ïoh bun ki jingujor na ki paidbah nong shong shnong khamtam kito kiba na ki longïing ba dang duna ka ioh ka kot, kiba kynduh jingeh ha kaba siew ïa ka bai bor ding kaba heh dor bad ong ruh ba hapoh ka district, ki dang don bun ki long ïing kiba duk kiba dang duna ha ka ïoh ka kot ha kaba siew ïa ka bai bording ba la shna bill da ka tnat bording ka bym sngewïahap shuh bad ka rukom ïoh bor ing.
Ha kajuh ka por, ka Synjuk ki Waheh Shnong EJHD ki la pynpaw ka jingsngew khia halor ka jingjot, jingjulor ki nar post electrict ha ki shnong ki thaw, kiba la buh jingma ïa ki nongshong shnong.
Ka Synjuk ka la kyntu ïa ka tnat ba ka dei ban bujli noh mardor ïa ki nar post light kiba la jot bad julor bad ong ruh ba ki dei ban da trei tikna bha ïa ka kam ba kan ym wanrah jingeh lane ba kan ym buh jingma bad kyntu ruh ba ka tnat kan shimkhia ïa kane ka kam.