Pynsngew ka Seng Khasi Forum of Un-Aided Schools ha u MP bym ïoh jingïarap na ka Sorkar

Shillong, Jymmang, 08: Ka Seng Khasi Forum of Un-Aided Schools (SKFUS) ha ka sngi u Blei ka la aiti da ka dorkhas ha u MP ka Rajya Sabha u Prof. Rakesh Sinha ba un pynsngew lem sha ki tyndong skhor jong ka Sorkar Pdeng halor ka jingiehbeiñ bad shah ñiewbeiñ ha ka Sorkar Jylla ïa ki skul ba la pynïaid da ka Seng Khasi.
Ha ka dorkhas ba la soi da u Chairman u Bah P. Rani bad u Secretary u Dr. S. Khongthohrem, ka Seng Khasi ka la kam ba ka jingiehbein bad ka jingshah ñiewbeiñ ha ka Sorkar ka long halor ka jingbym ïoh jingïarap bad ban pynrung ïa ki skul ha ka SSA, RMSA, Adhoc bad Deficit Grants.
“Ki la don ki skul kiba la seng kiba la palat ïa ka 15-20 snem hynrei ki bym pat ïoh jingïarap eiei ruh em na ka Sorkar bad na ka tnat Pule Puthi jong ka Sorkar Jylla,” la ong ka dorkhas na ka Seng Khasi.
Na ka liang jong u Prof. Sinha uba la shong jingïalang bad ki nongïalam u la kular ba un sa pynsngew ïa kane ka jingeh bad ka jingshah iehbeiñ jong ki skul Seng Khasi sha ki tyndong skhor jong ka Sorkar Jylla bad sha ka Sorkar Pdeng ruh kumjuh, la ong u kyrwoh.