Shillong, Nailur, 15: Ka Jaiñtia Students Union (JSM) ha ka sngi Palei ka la aiti da ka jingthoh ha u Symbud Myntri Rangbah ka Jylla u Bah Sniawbhalang Dhar ban pynpaw ïa kiba bun ki mat ba donkam jong ki paidbah ka rilum Jaintia.
U President ka Union u Bah Leningstar Rymbai u la ïathuh, lyngba ka dorkhas ka seng ka la dawa ïa ka Sorkar Jylla ban shna noh mardor ïa ka Goverment College ha East Jaintia Hills ba la kular naduh u snem 2015.
U la ong ka jingbym don jong ka Government College hapoh ka district, ki samla pule kim don lad shuh da kumwei pat hynrei ki hap ban leit klas ha Kiang Nangbah Govt College, Jowai kaba don ha West Jaiñtia Hills.
U Bah Rymbai u la pynpaw ruh ka jingsngewnguh ïa ka Sorkar kaba la wanrah ïa ki People College Scheme sha ki saw tylli ki College ha rilum Jaiñtia, kata ïa ka East Jaiñtia College, ka Nongtalang College, ka Shangpung College bad ka Thomas Jones College, Jowai. Hynrei u la ong ba ka Sorkar ka shu pynbna ba ïa ka jingsiew tulop sha ki nonghikai jong kine ki Kolej yn bei hi da ka Sorkar hynrei kam shym la ai jingbthah eiei sha kine ki Kolej ha kaba ïadei bad ka Admission Fees, ka Monthly Fees bad kiwei kiwei.
“Ngi dawa ba ïa ka bai pule ha ki College kiba la shah pynrung ha ka People College Scheme dei ban bishar biang da ka Sorkar lane ka bai pule ka dei ban long kaba mar katjuh bad ka Kiang Nangbah Government College khnang ba ki People College kin ïoh jingmyntoi hynrei lym kumta kin shu long tang ki Political College,” u la ong haba kynthoh lada ka Sorkar ka don pisa ban siew ïa ka tulop ki nonghikai ha kiba bun ki College kiba shah pynrung ha ka People College Scheme hynrei balei pat ka Sorkar kam lah ban shna da ka College ka ban pynïaid hi da ka Sorkar.
Ka JSM ka la dawa ïa ka Sorkar ban shna pyndep noh mardor ïa ki lai tylli ki Residential School ha Shangpung, Amlarem bad ha Sabah Musniang kiba hap hapoh ka West Jaiñtia Hills District nalor kaba shna ruh ïa ka Pine Mount International School ha ka shnong Wahïajer, ka Engineering College ha ka shnong Thamuthlong bad ka Science College ha ka shnong Mustem.
Ka Union ka la kyntu ruh ïa ka Sorkar ban weng ïa ki jingeh ba la ïakynduh da ka Kiang Nangbah Government College, ha kaba ïadei bad ka jingdon jong ki kamra klas, ka jingduna ki nonghikai ha ka Morning Section. Shuh shuh, ka JSM ka la dawa ïa ka Sorkar ban kyntiew kyrdan noh ïa ka Laskeiñ C&RD block sha ka Civil sub-division ba thymmai.
U la ong, ki don kumba 100 tylli ki shnong bad ka jingbun briew ka la kynjoh ym duna ïa ka 1 lak ngut ki briew ha Laskeiñ Block, nalor ba ka peit ruh ïa ki shnong kum ka Khatkasla, Psiar, Moolber kaba hap hapoh ka Block I, ka thaiñ kaba dang don hapdeng ka jingïakajia pud.
“Kine ki shnong ki dei kiba dang sahdien ha baroh ki liang bad ki dei kiba dang donkam ïa ki kam pynroi bad namarkata ban pynkyllla dur ïa kine ki shnong, donkam kyrkieh ïa ka jingpynkha noh ïa ka Civil Sub-division,” u la bynrap.
Ha kajuh ka por, ka JSM ka la dawa ïa ka Sorkar ban buh ïa ka Police Outpost ha ka shnong Psiar kaba hap hapoh ka Jowai Police Station, ka shnong Huroi kaba hap hapoh ka Lumshnong Police Station, ka shnong Lakadong kaba hap hapoh ka Khliehriat Police Station bad ban kyntiew kyrdan ïa ka Lad Rymbai Putpost sha ka Police Station.
