Ther u Mukul ïa ka sorkar MDA ba pynngat ïa ki samla ha ka UAPA

Shillong, Nailur, 15: U nongïalam ka All India Trianmool Congress u Dr Mukul Sangma ha ka sngi Thohdieng u la takraiñ tyngeh ïa ka Sorkar Meghalaya Democratic Alliance ba la ïalam da ka NPP halor ka jingkynnoh ba la pynngat kyndon ïa ki samla kiba la shah kem ha ka 24 tarik, Naitung ha ka jinghuri hura ha Tura, hapoh ki kyndon jong ka Unlawful Activities (Prevention) Act, kaba dei tang ïa ki lehnoh bad ïa ki dkhot jong ki seng ba la shah kheiñ be-aiñ.
Ha ka jingïakren bad ki lad pathai khubor u Sangma u la ong ba ka jingleh jong ki bor synshar ha kaba ïadei bad ka jingjia ha Tura ka long kum ka jingsuhbuit lypa.
“Phi la ïohi ïa ka Sorkar, kaba nud ban pynngat kyndon ïa ki khynnah kiba khie dang san bad ïa ki samla, kiba dang dei ka rta ban pule, ki la shah pynngat hapoh ka Unlawful Activities (Prevention) Act, ka aiñ kaba la thmu kyrpang ïa ki lehnoh bad ïa ki dkhot jong ki seng kiba la shah kheiñ be-aiñ,” u la ong.
“Kane ka kdew shai ba ka Sorkar ha ka jaka ban ai ïa ka hok ka long pynban ka nongleh kam bymman. Ka dei ka kam bymman. Lada mano mano ki shu kynnoh lamler tang ban buhrieh ïa ki jingbakla lajong, hato kam dei ka kam bymman?” la ong u Sangma.
Haba pynrem jur ïa ka jingleh jong ka Sorkar, u Dr. Mukul Sangma uba la long teng u Myntri Rangbah barim ka jylla ula ong ba ka Sorkar ka la pyrshang ban pynjot ïa ka lawei jong kine ki khynnah rit.
“Manla ka lawei jong uwei pa uwei ka long kaba kongsan. Ka lawei jong u Conrad Sangma ruh ka dei kaba kongsan kumjuh ruh ka lawei jong kine ki khynnah kiba dang pule,” u la ong.
Ula pynkynmaw ruh ïa ka Sorkar Jylla ba ka don da ka kyndon lada kano kano ka kynhun kan shah pynbna kum ka seng lehnoh.
Shuh shuh u la dawa ïa ka Sorkar Jylla ba kan pynbeit ïa kine ki jingbakla bad ong ba kam dei shuh ban dang jia nangne shakhmat pyrshah ïa ki nongshong shnong jong ka jylla.