Khliehriat Nailar, 18: Ka Jaiñtia National Council Central Executive Council myn ha 13 tarik mynta u bnai nailar ka la leit hiar sha shnong Bataw East Jaiñtia Hills district ha kaba haka jingialang, ka seng ka la ioh ban pynthymmai bad pynskhem ïa ki nongkitkam jong ka Jaiñtia National Council Southern Border Zone bad ïa ka jingïalang la pynlong ha ka ïing club jong ka dong Neiñshnong Cultural Club ha shnong Bataw.
Ia ka jingialang la pyniaid da u Publicity and Information Secretary JNC-CEC, u bah Mebanteilang Sukhlaiñ, ïa ki nongkitkam bad ki dkhot la pynskhem da u General Secretary JNC-CEC, u bah Wanshwa Suitng bad la ioh ruh ïa ki jingkren na u Vice President JNC-CEC, u bah nangjan Dkhar, u Chief Organising Secretary, u bah Philip Bamon bad u President JNC Khliehriat Circle, u bah Shanborlang Bamon.
Haba kren ha ka jingïalang, u bah Wanshwa Suting u la pynkynmaw ïa baroh ki para dkhot kiba don ha ka jingialang ba mynta ka kynti ka long shisha kaba kongsan tam ïa baroh ki dkhot jong ka seng ban long kiba peit pyrman bad husiar bha ban tehlakam ïa ka jingwan rung kyrthep ki bar ri bad ki bar jylla sha kane ka bri u Hynñiewtrep bad u la ong ruh bad kyntu ruh ban long kiba la pynkhreh ban iamih madan ha kano kano ka por naka bynta ban ïada ïala ka jong ka Ri “ha kajuh ka por nga pynkynmaw ruh ïa ki lai tylli ki mat kiba kongsan ban kamai ïa ka hok, ban ri ia ka tip kur, tip kha bad ban im tip briew tip Blei namar kine hi ki long ki mawbyrsiew kiba ngin buh hakhmat eh ha ka kam shakri ïa ka imlang ka sahlang khnang ba ngin long shisha kita kiba skhem ha ka nongrim kumba uba rim uba jah u la hikai iangi ki longdien” la bynrap u bah Wanshwa Suting..
Ki nongkitkam ba thymmai jong ka JNC Southern Border Zone kiba la jied bad pynskhem ha katei ka sngi ki kynthup u President, u bah Jari Pajat, Vice president, u bah Shanbor Chadong, General Secretary, u bah Marbaitlang P Suchiang, Asst. Secretary, bah Arki P Suchiang, Finance Secretary, Baitmon Biam, Publicity Secretary, bah Lamphrang Patwat, Education Secretary, Richard Lamare, Arts & Culture Secretary, William Suchen, Chief Organising Secretary, Odipta Pyrtuh, Sport Secretary, Richida Sumer, Asst. Sport Secretary, Lasoki Mynthlu, Environment Secretary, Du-i-hi Lamare, Discipline Secretary Balen Rupsi, Office Secretary, Evan Chadong, kynthup ruh ki dkhot jong ka Executive committee, u bah Roy Rymbai, Skhem Suchen, Iaishanbor Mawlong bad kiwei kiwei.
