Nongpoh, Nailar 18: Hapdeng ka jingiphuh iphieng ka ophis jong u Sub-Divisional Officer, Patharkhmah Civil Sub-Division ryngkat ka jingïatreilang bad ka ophis u Deputy Commissioner Ri-Bhoi District, ka ophis jong u Block Development Officer, Jirang C&RD Block kala pynkut noh ïaka tamasa ba 2 sngi lynter ba la tip kum ka JOWE Festival bala pynlong haka 13 bad 15 tarik Nailar 2024 kaba dei ruh ka sngi rakhe ïaka jinglaitluid ka ri India kaba 78 bala pynlong ha madan Western Ri-Bhoi Sports Association.
Ha katei ka tamasa la wan ruh ban shim bynta da ki spah tylli ki shnong ba hap ba Patharkhmah Civil Sub Division bad lyngba kane ka tamasa ki nongshong shnong jong kane ka thaiñ ki la ioh lad ban pyni ia ka sap ka phong, ka jingriewspah jong ka riam tynrai, ki jingbam tynrai bad kiwei kiwei kiba dang pynneh pynsah ha kane ka thaiñ.
U Bah Sosthenes Sohtun MLA ka Jirang u la wan ban shim bynta kum u kongsan ha katei ka sngi haka jingdonlang u Bah Damanbait Lamare MLA ka Umroi, u A Baranwal Deputy commissioner ka Ri-Bhoi, u Bah MB Tongper SDO ka Patharkhmah Civil Sub Division bad kiwei kiwei ki ophisar.
Ïa katei ka tamasa la bei Pisa lyngba ka Chief Minister’s Special Grant bad ka skhim MSTEP (Meghalaya Sustainable Tourism Enhancement Programme) jong ka tnad jngohkai pyrthei, da ka jingthmu ban pynjan ka jingïadei hapdeng ki nongshong bad ka Sorkar bad lyngba Ka JOWE Festival ka pyni ïa ka ka jingroi bad jingkylla jong ka Patharkhmah Civil Sub-Division, kaba pyni ia ka jingiatylli, bad ka jingkyntiew ïa ka imlang sahlang.
Ha kane ka tamasa la wan ban shimbynta da ki kynhun nongrwai ba pawnam ka jylla bad lyngba kane ka tamasa ki nongrwai na ka thaiñ kum ka MGMP ki la ioh mynsiem bad ki la ioh lad ban ban pyni ia ka sap jong ki bad ban ioh ïa ka jingithuh, bad lyngba kane ka tamasa la sakhi ruh ia ka jingwan shim bynta ki jaitbynriew bapher bapher kiba sah bad kiba don ha kane ka thaiñ kiba kynthup ia ki kynhun Rabha, Garo, bad kiwei kiwei kiba la pyni ia ka jinglong tynrai ba kyrpang jong ki lyngba ka jingiohlad ban pyni haka shad bad ka put katem tynrai.
La pynlong ruh iaka jingïakop Miss bad Mr Western Ri Bhoi da ka jingthmu ban kyntiew ia ka jingshlur ki samla kiba ïashim bynta bad ban kyntiew ïa ki jinglong tynrai bad ka sap, bad ban pynshlur ïa ki samla ba kin long ki nongïalam, kane ka tamasa ka don ruh ka jingangnud ban pyniajan ïa ka jingïadei hapdeng ki jaitbynriew bapher bapher, khamtam kito kiba sah ha ki kahpud jong ka jylla, ban wan rah ka jingïasngewthuh jingmut.
Shuh shuh la pynlong ruh ïa ka jingiakop shet jingshet ba la shimbynta da ki kynhun Self-Help Group kiba la pyni ïa ka jingriewspah jong ki jingbam tynrai, ki jingïakop shad tynrai, ki skit bala wan ban shim bynta da ki skul bapher bapher.
