Plie u Dy. CM ïa ka ‘Community Hall’ bad ka ‘Land Development for Waste Land’ ha ka shnong Pyndendiwah

Mawkyrwat, ‘Nailar, 18: U bah Prestone Tynsong uba dei u Symbud Myntri Rangbah ka Jylla Meghalaya kum u kongsan ha ka 17 tarik u ‘Nailar, 2024 ka sngi saitjañ jong ka taïew u la ïoh ban plie paidbah ïa ka Community Hall ha ka jingmang pisa kaba T. 34,82,605/- lak bad ïa ka Land Development for Waste Land kaba ha ka jingmang pisa ba T. 26,84,106/- tyngka ha shnong Pyndendiwah, South West Khasi Hills District.
Lah ban kdew ba ïa ka Community Hall la pyntrei na ka Mahatma Gandhi National Rural Employment Guarantee Act jong u snem 2023 – 2024 napoh Mawkyrwat C&RD Block kaba kot ïa ka T. 20/- lak tam bad na ka Chief Ministers Special Development Fund jong u snem 2021 – 2022 kaba kot T. 14/- lak tam bad ïa ka Land Development for Waste Land kaba T. 26/- lak tam la pyntrei da ka Mahatma Gandhi National Rural Employment Guarantee Act 2023 – 2024 napoh Mawkyrwat C&RD Block.
U bah Prestone Tynsong haba kren ha ka jingïalang u la ong ba kumba ka shnong Pyndendiwah la buh jingkyrpad halor ki 7 tylli ki mat ba kongsan lyngba ka Dorkhas, u buh ka jingkyntu ba ïa ki jingdonkam baroh kin sa wan lyngba ki nongmih-khmat kata na u MLA bad u MDC khnang ba yn lah ban ïa pynbeit ryntih bad ba ki kam ki jam kin long kiba seisoh. Ha kaba ïa dei bad ka madan ïalehkai ne ka Futsal Play Ground, u la ong ba ka la don lypa ka mang pisa ba kyrpang bad kam don jingeh lada yn pyntreikam ïa, ïa ka River Rejuvenation (Dam) ula ai jingmut ba napoh ka Soil Conservation ki don ki skhim bad u buh ka jingkyrpad ïa u MLA ba un shim jingkitkhlieh ban sa leh ïa kaba donkam da kaba u kular ruh ba lada ym don ka jingïatreilang yn nym lah da lei lei ban pyntyllun ïa ki kam shakhmat”, u la ong.
Haba kren ha kaba ïa dei bad ki lynti ki synkien, u bah Prestone Tynsong u la ong ba kumba u bah Renikton u la dep ban pynsngew halor ki mat jingdonkam ba ka surok na Pyndendiwah sha Laitnongrim ka dei ban pynïasoh, ma u ruh ula kubur ba ka surok ka long kaba donkam shisha namar ka dei u bud lum jong ka ïoh ka kot hynrei shwa ban sdang ïa ka jingtrei ynsa peit bniah shwa katkum ka jingdonkam baroh.
Ha kaba ïa dei bad ki jingdonkam jong ki paidbah ha ka ïaid ka ïeng lyngba ki surok kiba bha ban ïaid na Mawkyrwat – Shilong, u bah Prestone Tynsong ula ong ba kumba la kwah da u MLA ka Mawkyrwat ba u la wan ban pynsngew manla ka por, ha ka jingkren jong u mynta ka sngi, ula pyntip paidbah ba na ka World Bank Scheme Phrase – II ka sorkar ka la ïoh ïa ka mang pisa kaba T. 2000 klur ban pyntreikam hapoh ka Jylla Meghalaya. “Na kane ka mang pisa, yn bhah ruh ba ka surok na Weiloi – Mawkyrwat bad haduh Ranikor kan dei ka jingbhah ba nyngkong tam ba ynsa pyntrei ne shna ïa ka surok da ka Intermediate Lane”, u la ong bad buh ruh ka jingkyrpad ïa ki ar ngut ki nongmihkhmat ba ki dei ban pynthikna ba lada pynheh ïa ka surok kan nym don kano kano ka jingpynthut ha kaba ïa dei bad ki jaka ki puta namar ba shwa u snem 2027 kane ka pisa ba la mang na ka World Bank kan long kaba seisoh ban pyntreikam ïa ka roi ka par jong ka Jylla baroh kawei bad hapoh ka South West Khasi Hills District.
Halor ka rep ka riang pat, u bah Prestone Tynsong u la ong ba ha man kawei pa kawei ka Block na ka liang ka Agriculture Department ka la ka dei ban shna ïa ka jaka buh kyrpang jong ki mar rep ne ka Go-Down/Storage kaba la buh la kumno kumno 3 haduh 5 bnai khnang ba lada hiar ka dor kin buh tyngkai shwa bad ynda kiew ka dor pat kin sa pyllait ban die. Ha kaba ïa dei bad ka koit ka khiah hapoh ka Civil Hospital, Mawkyrwat, u bah Prestone Tynsong ula kular ba unsa thaw ki lad ki lynti katkum jingkwah jong ki paidbah ba ki la dep ban pynsngew lyngba u MLA jong ka Mawkyrwat Constituency ryngkat ka jingïatreilang jong baroh khnang ba ki jingthmu baroh kin urlong.
Ula ïathuh ruh ba ka sorkar ha kine ki sngi, ka la dep ban mang pisa biang ban tei ne shna ïa ki jaka pule ba ki khot ka Eklavya Model Residential Schools ne EMRSs haduh 35 tylli tang hapoh ka Jylla Meghalaya ha kaba kawei pa kawei ka projek ka kot haduh T. 40 klur tam ha kaba jinglong jingman jong kata ka jaka pule kan ïa ryngkat dor kum ka ‘Pine Mount School’. “Ka jingthmu ban shna ïa kine ki 35 tylli ki skul pule ha ki Block Head Quarter ka la ïaid shakhmat ha kaba ka jingmut ba kyrpang ka long na ka bynta ka jingmyntoi jong ki khun ki kti ha ki shnong ki thaw khnang ba ki kmie ki kpa kin nym ïa beh than ha ki jaka ba kham jngai ban phah pule ïa ki khun ki kti”, bynrap u bah Tynsong.
Shuh shuh u bah Prestone Tynsong u la ong ba haba phai dien ha kine ki 6 snem kiba la leit noh ki kam kiba bun ba kum ka sorkar ka la dep ban leh la ka long ka jingpynurlong ban pynkylla ïa ka Sngap Syiem College, Mawkyrwat sha ka Community College ne People’s College ryngkat ka jingaibhah nonghikai ruh haduh 24 ngut ne 24 post, bad kiwei de ki kam pynroi.
Kiwei de ki nongkren ha kane ka sngi ki long u bah L.T. Tariang, MCS, Additional Deputy Commissioner & Project Director jong ka DRDA, South West Khasi Hills District, u bah Carness Sohshang, MDC ka Mawkyrwat Constituency, u bah Renikton Lyngdoh Tongkhar, MLA ka Mawkyrwat Constituency ha ryngkat ka jingïadonglang u bah G.D. Kharwanlang, IPS, Superintendent jong ki Pulit, u bah B. Kharjana, Additional SP jong ki Pulit, u bah A.L. Bareh, MCS, Assistant Commissioner, South West Khasi Hills District, u bah I. Lawryniang, MCS, BDO ka Mawkyrwat C&RD Block bad kiwei de ki ophisar sorkar bad ki paidbah jong ka Shnong Pyndendiwah.
Ha kane ki la don ruh ki program jingshad bad jingrwai kata ka Step Dance na ka Banylla Jyrwa & CO bad ka Traditional Dance na ka Seng Samla Shnong Pyndendiwah.
Ïa ka jingïalang la pynïaid da ka kong Hairemity Jyrwa, ka jingkren pdiang na u bah I. Lawryniang, MCS, BDO ka Mawkyrwat C&RD Block, u bah Spiland Jyrwa, Myntri Shnong Pyndendiwah bad uba la aiti ïa ka Dorkhas sha u bah Prestone Tynsong, u bah Renikton Lyngdoh Tongkhar bad u bah Carness Sohshang, ka jingkren lyngkot na ka kong Aitimery Marbaniang, Secretary VEC kaba la kren katto katne halor ka project bad jingkren khublei na u bah James Jyrwa.