Shillong, Nohprah, 13: U Mission Director jong ka Drug Reduction Elimination and Action Mission (DREAM) u Bah F.G. Kharshiing ha ka sngi Thohdieng u la pynshlur ïa ki riewshimet kiba angnud ban buh ïa ki Rehabilitation Centre.
Haba kren sha ki lad pathai khubor hadien ba la wai ka jingïalang bad ki nongpynïaid jong ki 11 tylli ki Rehabilitation Centre bad ki Councelling Centre na rilum Khasi bad Jaiñtia bad kynthup ruh ïa ki nongpynïaid jong ki 4 tylli ki shlem ai jinghikai pyntbit kiba don ha nongbah Shillong, u Bah Kharshiing u la ong, “ki Rehab Centre kiba don mynta ha ka rukom sumar ki biang. Hynrei ka jingdon jong ki Rehab Centre ki duna palat. Nga la ïakren ïa kane bad ki paidbah bad nga la thoh sha ki Deputy Commisioner ruh bad na ka liang jong u Myntri ka tnat Social Welfare ruh u la ïathuh ba ka Sorkar shen kan sa sdang noh ban plie 20 tylli ki Rehab Centre.’
“Nga la kyrpad ïa ki Deputy Commisioner ba kin khot jingïalang ïa ki briew kiba kham riewspah bad kiba don ba em hapoh ki distrik jong ki ba kin wan shakhmat ban ïarap ban seng ïa ki Rehabilitation Centre,” ong u Bah Kharshiing bad bynrap, “nga ruh nga dalade nga la pyrshang ban kren ïa ki briew. Kumba ka long mynta ki don lai jaka kiba la kloi ban seng ïa ka Rehab Centre. Kawei ha Mawngap, ha Sohryngkham bad kawei ha Mawdiangdiang.”
“Nga long kum u atiar ban pynshlur ïa ki bad ban donkam kano kano ka jingïarap na ka Sorkar ruh ngan ïarap ban pynïakren,” la ong u Bah Kharshiing.
“Nga kyrpad ïa ki briew kiba don ba em bad kiba don ïa ka mynsiem ban ïarap ha kano kano ka rukom kin mih shakmat ban kyrshan ne ha kano kano ka rukom na ka bynta ban tehlakam ïa u drok uba long ka jingeh ïa ka ri jong ngi mynta,” la bynrap shuh shuh u Bah Kharshiing.
