Shillong, Nohprah 13: Ka Martin Luther Christian University (MLCU) Press da ka jingsarong ka la pyllait paidbah ïa ki 3 tylli ki kot ha ka sngi Palei ha ka sngi ba la plie ïa ka Winter Tales 2024, kaba la long ha Ward’s Lake, Shillong.
Kane ka tamasa kaba dei ka jingrakhe ïa ka jingriewspah ka jinghiar pateng ka riti dustur bad ki jingdonkam ban pynneh pynsah ïa ki, bad kadei ruh ka jaka ban plie ïa ki kam pule puthi ne ka thoh ka tar bad ban burom ïa ki jingriewspah ki jinghiar pateng kane ka thaiñ bad ka jingdon ki artist kiba nohsynniang.
Kine ki kot ba la pyllait ki dei ka Pahsyntiew kaba dei ka Folktale na Meghalaya ba la pynthymmai da ka samla Amayda Eden Syiem, da ka jingtrei ne artwork da u Bah Casper Syiem.
Ka Sohlyngngem bad Other Forgotten Songs ba la thoh da H. Teslet Pariat ba la pynkylla ktien, ka jingbuh ïa ki musical notation, bad leh ki recording da Dr. Mebanlamphang Lyngdoh, Bah Tyngshainlibor L. Mawphlang, bad ka samla Amabel Susngi.
Ka Bird Folktales of Meghalaya for Children ne ka Ki Khanaparom Shaphang Ki Sim Ha Meghalaya Na Ka Bynta Ki Khynnah la pynbeit bad la pynthymmai da Dr. Glenn C. Kharkongor, bad ba la pynkylla sha ka ktien Khasi da Dr. Evarisha Mercy Syiem bad ba la pynwandur da ka samla Balaiamon Kharngapkynta bad ka samla Careen Joplin Langstieh.
Kane ka prokram ka la sdang ha ka por 11:00 baje mynstep da ki workshop bad ki kam, kiba ïaid lang bad ka jingpyllait ïa kine ki kot ha ka por 1:30 baje nohphai sngi. Katba ka Pahsyntiew, ka Folktale ne khanaparom na Meghalaya Dr. Larilin Kharpuri la pynithuh da ka samla Amayda Eden Syiem bad u Bah Casper Syiem, kiba la ïathuh shaphang kiei kiba don ha kane ka kot. Kane ka jingïalang ka kynthup ïa ki kam ïasyllok na ka bynta ki khynnah haba ïadei bad ki kot kum ki unwrapping, ki jingïalehkai, ka jingai rong, ha ryngkat lang bad ki kot kiba don ki jingsoi.
Haba ïadei bad ka Ka Sohlyngngem bad Other Forgotten Songs, ka jingpyllait ka pyni ïa ki jingtrei da Dr. Mebanlamphang Lyngdoh bad samla Amabel Susngi, ba la pynbud da ka jingpynithuh ha ryngkatlang bad u Bah Tyngshainlibor L. Mawphlang.
Halor kane na ka liang Dr. Mebanlamphang la sam ïa ki jingai mynsiem kiba don shalyndet kane ka kot, katba u Bah Danny Pariat u la kren shaphang ka jingnohsynniang u H. Teslet Pariat bad ïa kane ka kot la pyllait da ka ïing ka sem jong u.
Ïa ka Bird Folktales of Meghalaya for Children na ka liang Dr. Larilin Kharpuri la pynithuh ïa Dr. Glenn C. Kharkongor, Dr. Evarisha Mercy Syiem, bad ka samla Balaiamon Kharngapkynta. Ki nongthoh ki la batai shaphang ki mat ki phang bad kumjuh ruh kumno ba la pynwandur ïa ka.
Ha kane ka jingpyllait ïa kine ki kot ka la don ruh ka jingpynïohi bad pynsngap ïa ki sim, ba la pynbud da ka children-led launch, nalor kiwei ki mat kiba kongsan.
