Khliehriat, Nohprah, 13: Kum bynta ban ai mynsiem ha ka jingpynkhreh jong ka shnong Moolamylliang, East Jaiñtia Hills District ïa ka “Christmas Lights Extravaganza” ne ki jingpynthaba ïa ki bording Christmas ha une u snem bad ban pynneh pynsah ïa ka jingkhuid jingsuba, ka MLA jong ka Sutnga-Saipung Constituency ka Kong Santa Mary Shylla ka la leit ban ïashim bynta lang ha ka jingpynkhuid ïa ki sawdong sawkun jong ka shnong ka thaw baroh kawei.
Ha kane ka sngi, la ïa don ryngkat lang u SDO jong ka Khliehriat, u Aditya Verma, u Block Development Officer ka Saipung C&RD u Dr R.Pyrtuh bad ki nongshong shnong kiba la mih ryntih ban pynkhuid ïa ki sawdong sawkun hapoh ka shnong.
Ka Kong Santa Shylla haba kren shwa ban pynkhuid ïa ka shnong ka thaw, ka la kyntu ïa ki nongshong shnong jong ka shnong Moolamylliang ba kin nang trei shitrhem ban nang kyntiew shuh shuh ïa ka shnong ha ka liang ka khuid ka suba bad ka jingpynjyrngam bad khamtam eh ka jingwanrah ruh ïa ka koit ka khiah hapdeng ki nongshong shnong.
Ka la kyntu ruh ïa ki nongshong shnong ban don ïa ka mynsiem ïatreilang ryngkat ryngkat bad ki nongpynïaid shnong khnang ba kin lah ban ïalam ïa ka shnong ha ka liang ka roi ka par ha baroh ki liang.
U Waheh Shnong jong ka Moolamylliang u Bah Apmon Pachiang u la pynpaw ka jingsngewnguh ïa ka MLA wat hapdeng ka jingbunkam hynrei ka la pyllait por khnang ban ïashim bynta ha ka jingpynkhuid shnong kumjuh ïa baroh kiba la wan ïashim bynta ban pynlong ïa kane ka jingpynkhuid shnong kaba jop.
